Лінкі ўнівэрсальнага доступу

Суд у Тайляндзе аштрафаваў музыкаў «Бі-2» на 95 даляраў, на іх канцэрты зьвярнула ўвагу расейская дыпмісія


Рок-гурт «Бі-2». Ілюстрацыйнае фота
Рок-гурт «Бі-2». Ілюстрацыйнае фота

Удзельнікаў рок-гурту «Бі-2», якія раней выступалі супраць вайны Расеі ва Ўкраіне, затрымалі 25 студзеня ў Тайляндзе за правядзеньне канцэртаў без дазволу на працу.

Суд у Пхукеце 26 студзеня аштрафаваў музыкаў «Бі-2» на 95 даляраў кожнага, пішуць «РИА Новости».

Пра іх затрыманьне пасьля канцэрту ў Тайляндзе стала вядома 25 студзеня. Прычынай называўся «выступ без дазволу на працу».

Канцэрты «Бі-2» прайшлі ў Патаі і правінцыі Пхукет.

Паводле інфармацыі Mash, прычына затрыманьня ўдзельнікаў гурту «Бі-2» — антырасейская пазыцыя і падтрымка Ўкраіны, ініцыятар — генконсульства Расеі ў Тайляндзе.

Па словах суразмоўцы Mash у консульстве, расейскія дыпляматы зьвярнуліся да ўладаў Тайлянду з просьбай уважліва праверыць дакумэнты музыкаў.

«Бі-2» — рок-гурт, утвораны ў 1988 годзе ў Бабруйску, ягоныя заснавальнікі і нязьменныя ўдзельнікі Аляксандар Уман (Шура) і Ягор Бортнік (Лёва) паходзяць зь Беларусі.

  • З часам музыкі перабраліся ў Расею і сталі адным з самых камэрцыйна пасьпяховых гуртоў на расейскай сцэне.
  • Музыкі асудзілі расейскае ўварваньне ва Ўкраіну. Неўзабаве пасьля пачатку вайны Расеі ва Ўкраіне, у красавіку 2022 году, гурт «Бі-2» адмовіўся выступаць на канцэрце ў Омску на фоне банэра «Za президента». Пасьля гэтага гурт перанёс шэраг выступаў.
  • У 2023 годзе ўдзельнікі гурту эмігравалі ў Ізраіль.
  • У чэрвені 2023 году лідэра гурту Ягора Бортніка прызналі ў Расеі «іншаземным агентам». Як растлумачыла Міністэрства юстыцыі РФ — за тое, што музыка выступаў супраць вайны Расеі ва Ўкраіне і «нэгатыўна выказваўся пра расейцаў».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG