Мытны камітэт Беларусі паведаміў, што з 18:00 12 студзеня 2024 года пропуск праз мяжу Беларусі і Расеі грузавых машын зь іншых дзяржаў – чальцоў ЭАЭС (Кыргызстана, Казахстана і Армэніі) – будзе ажыцьцяўляцца выключна праз участак беларуска-расейскай мяжы «Езярышча-Лабок».
Пры гэтым беларускія мытнікі спасылаюцца на інфармацыю Памежнай службы Расеі.
Раней пра праблему заявілі казахстанскія ўлады, бо празь беларуска-расейскую мяжу прапускалі толькі кіроўцаў-міжнароднікаў зь Беларусі і Расеі. Міністар гандлю Казахстану Арман Шакаліеў заявіў, што першыя праблемы на гэтым кірунку зафіксавалі 8 студзеня, і што гэта парушэньне дамоўленасьцяў ЭАЭС, піша Kazinform.
Паводле міжнародных пагадненьняў ЭАЭС, у гэтых краін адсутнічае мытная мяжа. Саюз дэкляруе свабоднае перамяшчэньне тавараў.
У канцы сьнежня Міністэрства гандлю Казахстану адзначала, што экспарт тавараў з Казахстану ў краіны ЭАЭС вырас на 90%.
