«Мама дома да суду. Перадае ўсім добрым людзям дзякуй за клопат і падтрымку», — напісала ў Facebook Ганна Севярынец, дачка Тацяны Севярынец.
Пра затрыманьне Тацяны стала вядома 9 студзеня. Пасьля затрыманьня жанчына трапіла ў лякарню праз праблемы зь ціскам.
Праўладныя тэлеграм-каналы сьцьвярджаюць, што адміністрацыйны працэс у дачыненні да Тацяна пройдзе 25 студзеня. Яе вінавацяць у разьмяшчэньні ў Facebook нібыта «экстрэмісцкіх матэрыялаў».
- Тацяна Севярынец — маці асуджанага на 7 гадоў калёніі строгага рэжыму палітзьняволенага палітыка, пісьменьніка, аднаго з заснавальнікаў «Маладога фронту», аднаго зь лідэраў партыі «Беларуская хрысьціянская дэмакратыя» Паўла Севярынца.
- У кастрычніку 2020 году Тацяну Севярынец затрымлівалі за ўдзел у маршы пэнсіянэраў.
- Самога Паўла Севярынца затрымалі 7 чэрвеня 2020 году, у разгар кампаніі па зборы подпісаў за вылучэньне кандыдатаў у прэзыдэнты. Ён у гонцы ня ўдзельнічаў, але выкарыстоўваў перадвыбарны пэрыяд для размоваў зь людзьмі. У той дзень сустаршыня БХД правёў на плошчы ля сталічнага Камароўскага рынку «народны пікет свабоды і салідарнасьці».
- 25 траўня 2021 году Магілёўскі абласны суд пакараў Севярынца 7 гадамі калёніі ўзмоцненага рэжыму па абвінавачаньні ў «падрыхтоўцы да масавых беспарадкаў».
- 23 сакавіка 2022 году апазыцыйны палітык быў унесены ў пералік асоб, «датычных да экстрэмісцкай дзейнасьці», а 21 чэрвеня суд Шклоўскага раёну (Магілёўская вобласьць) зьмяніў рэжым утрыманьня палітвязьня — пастанавіў накіраваць яго ў турму на 3 гады.
