Анджэй Дуда сказаў, што Польшча падтрымлівала і падтрымлівае беларускую грамадзянскую супольнасьць і мэдыя. І сам ён на кожнай міжнароднай сустрэчы падкрэсьлівае важную ролю Беларусі ў бясьпецы ўсёй Эўропы, паведамляе прэсавая служба Ціханоўскай.
На сустрэчы з прэзыдэнтам Дудам Сьвятлана Ціханоўская абмеркавала сытуацыю ўнутры краіны і вайну ва Ўкраіне. Яна прапанавала зрабіць усё магчымае, каб Беларусь «ня стала суцяшальным прызам для Пуціна».
Таксама палітыкі абмеркавалі сумесныя дзеяньні ў міжнародных арганізацыях, у тым ліку ў ААН.
Ціханоўская расказала пра сытуацыю з палітвязьнямі, у тым ліку з Анджэем Пачобутам, якога трымаюць у рэжыме «інкамунікада». Яна заклікала працягваць ціск на рэжым з мэтай вызваленьня палітвязьняў, а таксама падтрымаць мэханізмы прыцягненьня рэжыму Лукашэнкі да адказнасьці за рэпрэсіі ў дачыненьні беларусаў, а таксама за злачынствы супраць Украіны, у тым ліку за дэпартацыю ўкраінскіх дзяцей.
Палітыкі абмеркавалі таксама магчымыя мерапрыемствы на працягу году ў рамках «Люблінскага трыкутніку», куды ўваходзяць Польшча, Літва і Ўкраіна. Ціханоўская папрасіла, каб Беларусь таксама ўключылі ў гэты фармат.
У канцы сустрэчы Ціханоўская ўручыла прэзыдэнту Польшчы Крыж Добрасуседзтва. Узнагарода ўручаецца палітыкам і высокім службовым асобам за падтрымку беларусаў у барацьбе за свабоду.
Акрамя Анджэя Дуды, Крыж Добрасуседзтва атрымалі прэзыдэнтка Эўрапарлямэнту Рабэрта Мэтсола, міністар замежных спраў Швэцыі Тубіяс Більстрам, міністар замежных спраў Польшчы Радослаў Сікорскі і іншыя.
Пасьля перамоў Дуда і Ціханоўская накіраваліся ў залю для прыёмаў, дзе адбылася сустрэча з прадстаўнікамі беларускай грамадзянскай супольнасьці. Больш за 150 чалавек грамадзкіх актывістаў, экспэртаў, журналістаў узялі ўдзел у гэтай сустрэчы.
Каляднікі пад кіраўніцтвам Сяргея Доўгушава прасьпявалі беларускія песьні.
