Лінкі ўнівэрсальнага доступу

Сьвятлана Ціханоўская расказала, чаго чакае ад польскіх уладаў сёлета


Сьвятлана Ціханоўская
Сьвятлана Ціханоўская

Сьвятлана Ціханоўская разам з прадстаўнікамі Кабінэту Алінай Коўшык, Валерам Кавалеўскім і Паўлам Латушкам сустрэлася з мэрам Варшавы Рафалам Тшаскоўскім.

Сустрэча прайшла ў офісе мэра, Сьвятлана Ціханоўская падзякавала мэру за падтрымку рэпрэсаваных беларусаў.

Сьвятлана Ціханоўская прапанавала мэру правесьці сумесную інфармацыйную кампанію ў падтрымку Анджэя Пачобута і іншых беларускіх палітвязьняў, запрасіла далучыцца да Дня Салідарнасьці зь Беларусьсю 25 сакавіка, а таксама ўзьняла пытаньне выдзяленьня памяшканьняў для беларускіх арганізацый, ініцыятываў, у тым ліку беларускага тэатру, школы, мастацкай галерэі. Таксама яна папрасіла працягнуць праграму падтрымкі беларусаў, рэпрэсаваных сем'яў па забесьпячэньні іх жытлом, наколькі гэта будзе магчыма, паведамляе прэс-служба Ціханоўскай.

Таксама Сьвятлана Ціханоўская папрасіла мэра дапамагчы з падрыхтоўкай кадравай рэзэрвы для новай Беларусі, каб беларусы маглі прайсьці стажыроўкі ў гарадзкіх установах, і папрасіла арганізаваць стыпэндыю для беларускіх культурных дзеячоў, як гэта зроблена ў іншых гарадах Польшчы, каб даць магчымасьць вядомым культурным дзеячам працаваць у Варшаве.

«Новы ўрад Польшчы разумее сытуацыю ў Беларусі. Міністар Сікорскі супрацьстаіць дыктатуры шмат гадоў. Чаго мы хочам цяпер — гэта больш рашучасьці ў дзеяньнях», — сказала Сьвятлана Ціханоўская на брыфінгу па выніках сустрэчы. Яна нагадала, што за апошнія 3 гады было распачата шмат добрых ініцыятываў, але ня ўсе даведзеныя да канца. Гэта тычыцца і санкцыйнай палітыкі, і прыцягненьня да адказнасьці, і лабіяваньня інтарэсаў беларусаў ня толькі ў Польшчы, але і на міжнароднай арэне.

«У Польшчы рабілася і робіцца шмат, але трэба больш ангажаваньня ўладаў у беларускім парадку дня», — сказала лідэрка дэмакратычных сіл Беларусі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Падсумаваньне тыдня на Свабодзе – у адным суботнім лісьце! Усе эксклюзіўныя і важныя публікацыі за тыдзень – у нашай эмэйл-рассылцы: так вы ніколі не прапусьціце самае цікавае!

Дык падпісвайцеся!

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG