3 студзеня Сьвятлана Ціханоўская пракамэнтавала блякаваньне сэрвісу Youtube ў Беларусі падчас яе навагодняга звароту да беларусаў.
«Я чула паведамленьні аб тым, што YouTube быў заблякаваны ў Беларусі падчас майго навагодняга выступу. У мяне ёсьць некалькі навін для рэжыму. Па-першае, відэа з прамовай можна паглядзець у любы час.
Па-другое, нельга душыць праўду, саджаючы журналістаў у турму ці абмяжоўваючы доступ у інтэрнэт», — напісала Ціханоўская ў сацыяльнай сетцы X, разьмясьціўшы спасылку на свой выступ.
- У прамежак паміж 23:30 і 00:10 з 31 сьнежня на 1 студзеня многія карыстальнікі ў Беларусі не змаглі зайсьці на Youtube. Часовае блякаваньне адбылося перад выступам Сьвятланы Ціханоўскай, які трансьляваўся праз гэты сэрвіс. Паказальна, што доступ зьнік не ўва ўсіх інтэрнэт-карыстальнікаў. Праз VPN-сэрвісы YouTube быў дасяжны. Агулам блякаваньне доўжылася каля 20 хвілін.
- Гэта першая вядомая спроба заблякаваць YouTube у Беларусі. Раней бывала, што ўлады цалкам адключалі доступ да інтэрнэту, як 9-12 жніўня 2020 году.
- Нягледзячы на перашкоды, зварот на момант публікацыі артыкулу паглядзелі ўжо больш за 169 тысяч чалавек.
