Лінкі ўнівэрсальнага доступу

Беларусь падоўжыла на год забарону на ўвоз прадукцыі зь «недружалюбных» краінаў


Сярод забароненай для ўвозу прадукцыі – мяса і іншыя прадукты харчаваньня. Ілюстрацыйнае фота
Сярод забароненай для ўвозу прадукцыі – мяса і іншыя прадукты харчаваньня. Ілюстрацыйнае фота

Забарона будзе дзейнічаць да 31 сьнежня 2024 году.

Савет міністраў Беларусі прадоўжыў адразу на год дзеяньне забароны на ўвоз прадукцыі зь «недружалюбных» краінаў. Яе ўвялі ў 2021 годзе ў адказ на заходнія санкцыі пасьля жорсткага разгону акцыяў пратэсту супраць фальсыфікацыі вынікаў прэзыдэнцкіх выбараў у Беларусі ў 2020 годзе.

Як адзначаецца ў пастанове, апублікаванай на Нацыянальным прававым інтэрнэт-партале Беларусі, забарона будзе дзейнічаць да 31 сьнежня 2024 году.

  • У Беларусі з 1 студзеня 2022 году ў адказ на заходнія санкцыі ўвялі забарону на імпарт зь «недружалюбных краін». Пад абмежаваньні падпалі, сярод іншага, мяса сьвежае, астуджанае і замарожанае буйной рагатай жывёлы, сьвініны і свойскай птушкі, субпрадукты, тлушчы, каўбасы, мяса салёнае, у расоле, сушанае або вэнджанае, харчовая мука зь мяса або мясных субпрадуктаў, малако і малочная прадукцыя, гародніна, садавіна і арэхі, кандытарскія вырабы, соль.
  • У пералік «недружалюбных краін» былі ўключаныя Аўстралія, краіны Эўразьвязу, Канада, Ліхтэнштэйн, Нарвэгія, Новая Зэляндыя, Альбанія, Ісьляндыя, Паўночная Македонія, Вялікая Брытанія, ЗША, Чарнагорыя і Швайцарыя.
  • Папярэдні раз харчовыя «контрасанкцыі» працягвалі ў сьнежні 2022 году. Тады было вырашана, што яны дзейнічаюць да 30 чэрвеня 2023 году. Адначасова ўрад скараціў пералік забароненых прадуктаў: былі зробленыя выключэньні для насеннай бульбы, а таксама сьвежай бульбы, якая ўвозіцца з 1 студзеня па 30 чэрвеня, і яблыкаў, што ўвозяцца з 1 студзеня па 30 чэрвеня. Па-ранейшаму быў забаронены ўвоз цыбулі, сьвежай белакачаннай капусты, сьвежай морквы, сталовых буракоў, арэхаў, мясной і малочнай прадукцыі, кандытарскіх вырабаў, каўбас і аналягічных прадуктаў.
  • Абмежаваньні не распаўсюджваюцца на тавары, якія вывозяць у краіны ЭАЭС, а таксама іншыя дзяржавы для аказаньня міжнароднай гуманітарнай дапамогі. Таксама новаўвядзеньне ня тычыцца тавараў, якія ідуць празь Беларусь транзытам.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG