Лінкі ўнівэрсальнага доступу

Расейскі палітык Прылепін заклікаў далучыць да Расеі тэрыторыі Ўзбэкістану. У Ташкенце адрэагавалі


Захар Прылепін
Захар Прылепін

МЗС Узбэкістана выклікала расейскага амбасадара Алега Мальгінава за выказваньні сустаршыні партыі «Справедливая Россия — За правду» Захара Прылепіна, які на публічным мерапрыемстве прапанаваў далучыць да Расеі ўзбэцкія тэрыторыі.

Паводле афіцыйнага паведамленьня МЗС, падчас сустрэчы да Мальгінава «было даведзена, што такія неабдуманыя заявы маюць загадзя правакацыйны характар і могуць нэгатыўна адбіцца на гістарычна дружалюбных адносінах» паміж Узбэкістанам і Расеяй.

Паводле таго ж паведамленьня, Мальгінаў на сустрэчы зазначыў, што «сувэрэнітэт, незалежнасьць і тэрытарыяльная цэласнасьць Рэспублікі Узбэкістан ніколі ня ставіліся пад сумнеў у Расеі».

У расейскім МЗС заявілі, што «выказваньні Прылепіна ня маюць нічога агульнага з афіцыйнай пазыцыяй расейскага кіраўніцтва».

Напярэдадні Захар Прылепін, выступаючы на пасяджэньні адной са сваіх вайскова-палітычных структураў, сказаў, што канфлікты зь мігрантамі, якія пэрыядычна ўзьнікаюць у Расеі, можна вырашыць шляхам далучэньня новых тэрыторыяў, у прыватнасьці ўзбэцкіх. «Шчыра стаю на тым, каб вось гэтыя тэрыторыі, адкуль да нас едуць гастарбайтэры, каб іх далучаць і ўжо на месцы навучаць людзей расейскай мове. Каб не тут іх вучыць, а там, дапусьцім, ва Ўзбэкістане», — сказаў Прылепін.

Акрамя таго, ён заявіў, што пасьля меркаванай ім перамогі ў вайне з Украінай ніхто ня зможа забараніць Расеі «зрабіць штосьці карыснае на эўразійскай тэрыторыі», у тым ліку заявіць прэтэнзіі на тэрыторыі былога СССР. «Я не жартую. Мы будзем узьнімаць тэму дэзавуяваньня распаду Савецкага Саюзу, што дазволіць нам у любы момант сказаць: „Два мільёны нашых грамадзянаў знаходзяцца на вашай тэрыторыі, мы прэтэндуем на яе“», — растлумачыў Прылепін.

У жніўні Захар Прылепін атрымаў пасаду намесьніка камандзіра палка Расгвардыі «Оплот».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG