Лінкі ўнівэрсальнага доступу

ВНУ выставілі новыя цэны за навучаньне пасьля абяцанага Міністэрствам адукацыі падаражэньня. Наколькі яны ўзрасьлі?


Студэнцкая аўдыторыя ў Менску. Архіўнае фота
Студэнцкая аўдыторыя ў Менску. Архіўнае фота

Міністар адукацыі Андрэй Іванец тыдзень таму анансаваў рост цэнаў на навучаньне ў ВНУ на 3–17%.

1 сьнежня зьмены набылі моц. На сайтах некаторых унівэрсытэтаў ужо апублікавалі новыя расцэнкі. Выданьне «Люстэрка» прааналізавала павышэньне.

У Беларускім дзяржаўным мэдычным унівэрсытэце больш за ўсё цэны паднялі для будучых стаматолягаў. У параўнаньні з 1 верасьня 2023-га кошт навучаньня на гэтай спэцыяльнасьці вырас на 878 рублёў. Тым, хто вучыцца на «Лячэбнай справе» і «Пэдыятрыі», плаціць давядзецца на 750 рублёў больш.

На сайце БДМУ сказана, што даплаціць розьніцу ў аплаце першага паўгодзьдзя трэба да 14 студзеня 2024 году. На розных спэцыяльнасьцях яна складае ад 75 да 219 рублёў.

У Беларускім дзяржаўным унівэрсытэце інфарматыкі і радыёэлектронікі найбольш цэны падскочылі для студэнтаў малодшых курсаў дзённага навучаньня факультэтаў кампутарных сыстэм і сетак, інфармацыйных тэхналёгіяў і кіраваньня, а таксама інжынэрна-эканамічнага. Цана году навучаньня тут узрасла на 770 рублёў (было 4590 рублёў, стала 5360). Для параўнаньня, для трэцякурсьнікаў некаторых спэцыяльнасьцяў факультэту радыётэхнікі і электронікі павышэньне склала 467 рублёў — з 2803 да 3270 рублёў.

Даплату за навучаньне ў першым паўгодзьдзі студэнты-платнікі галоўнага ІТ-унівэрсытэту краіны павінны ўнесьці да 20 сьнежня. На сайце навучальнай установы таксама сказана, што ў 2023 годзе выдаткі нацыянальнага бюджэту на падрыхтоўку спэцыяліста з вышэйшай адукацыяй у гэтай ВНУ склалі 8367,31 рубля.

Раней рэктар БДУІР Вадзім Богуш тлумачыў, як фармуецца цана навучаньня ў ВНУ. Паводле яго, каля 90 працэнтаў выдаткаў — заробак супрацоўнікаў.

Рост плянавага фонду аплаты працы на 1 верасьня 2023 году ў параўнаньні з 1 верасьня 2022 году склаў 14,2%, удакладніў рэктар.

З студзеня 2024 году базавая стаўка аплаты працы ў бюджэтнай сфэры складзе 250 рублёў (рост 6,4% у параўнаньні зь 2023-м, 18,5% — у параўнаньні зь мінулым годам).

Павышэньне базавай стаўкі непасрэдна ўплывае на ўзровень заработнай платы работнікаў бюджэтнай сфэры (аклад, стымульныя і кампэнсацыйныя выплаты), што, у сваю чаргу, павялічыць плянавы фонд заробкаў работнікаў унівэрсытэту, заявіў Богуш.

Ён таксама адзначыў, што павелічэньне цаны навучаньня зьвязана з ростам выдаткаў на ўтрыманьне будынкаў, павелічэньнем расходаў на камунальныя паслугі, ростам цэнаў на энэрганосьбіты, павышэньнем цэнаў на паслугі іншых арганізацыяў.

У жніўні 2023-га міністар адукацыі Іванец заявіў, што ў Беларусі няма платнай адукацыі, а тое, што такім лічыцца, — гэта форма сацыяльнай падтрымкі моладзі, якая мае датацыі ад дзяржавы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG