Лінкі ўнівэрсальнага доступу

Жонка загінулага ва Ўкраіне беларускага добраахвотніка праз суд дабіваецца выплаты кампэнсацыі


Горад Аўдзееўка Данецкай вобласьці, дзе цяпер адбываюцца жорсткія баі. Ілюстрацыйнае фота
Горад Аўдзееўка Данецкай вобласьці, дзе цяпер адбываюцца жорсткія баі. Ілюстрацыйнае фота

У лютым 2022 году ўрад Украіны ўхваліў пастанову, якая рэгулюе пытаньні выплаты кампэнсацыі сваякам загінулых на вайне вайскоўцаў. Аднак яна забараняе выплачваць грошы сваякам і бацькам загінулых грамадзян Беларусі і Расеі.

Грамадзянка Ўкраіны зьвярнулася ў суд, каб прымусіць улады выплаціць кампэнсацыю ў поўным аб’ёме за гібель яе мужа-беларуса, які ваяваў ва ўкраінскім войску.

Ёй выплацілі 5 мільёнаў грыўняў (прыблізна 130 тысяч даляраў у эквіваленце. — РС), траціну ад прадугледжанага заканадаўствам памеру кампэнсацыі. Украінка лічыць, што ёй наўмысна затрымліваюць рэшту або ўвогуле ня хочуць выплачваць. Яна лічыць, што супрацоўнікі мясцовага цэнтру камплектаваньня і сацыяльнай дапамогі (новая назва вайсковых камісарыятаў ва Ўкраіне. — РС) спрабуюць знайсьці сваякоў, якія жывуць у Беларусі.

У судовым рашэньні адзначаецца, што бацькі маюць беларускае грамадзянства і па атрыманьне ўкраінскага пашпарта не зьвярталіся. Бацька беларускага добраахвотніка памёр, а маці жыве ў Беларусі. Ёй 74 гады.

У лютым 2022 году ўрад Украіны ўхваліў пастанову, якая рэгулюе пытаньні выплаты кампэнсацыі сваякам загінулых на вайне вайскоўцаў. Аднак яна забараняе выплачваць грошы сваякам і бацькам загінулых грамадзян Беларусі і Расеі.

Што вядома пра загінулага

Свабода не змагла высьветліць прозьвішча загінулага беларуса. Вядома, што ён нарадзіўся ў Гомлі, ажаніўся з украінкай у 2019 годзе, а да гэтага ўжо год служыў на падставе кантракту ва Ўзброеных сілах Украіны і ўдзельнічаў у антытэрарыстычнай апэрацыі. У траўні 2018 году паводле наказу Міністэрства абароны Ўкраіны яго ўзнагародзілі нагрудным знакам «За адданасьць вайсковай службе» трэцяй ступені.

У 2021 годзе беларус зноў добраахвотна пайшоў на службу ў войска — ён стаў камандзірам штурмавога аддзяленьня адной з рот, сфармаваных у Луганскай вобласьці.

Грамадзянін Беларусі загінуў у выніку атрыманага несумяшчальнага з жыцьцём раненьня ў часе расейскага артылерыйскага абстрэлу каля вёскі Салодкае Валнавахскага раёну Данецкай вобласьці. Дата сьмерці не ўдакладняецца, вядома, што пасьведчаньне аб сьмерці выдадзена 28 красавіка 2022 году. Яго пахавалі ў Крывым Рогу, па месцы пражываньня ягонай жонкі — яна перасялілася туды з Луганскай вобласьці пасьля пачатку баявых дзеяньняў.

У Крывым Рогу пахавалі яшчэ аднаго беларуса

Ва ўкраінскіх СМІ Свабода знайшла публікацыю аб пахаваньні 31 жніўня 2022 году ў Крывым Рогу беларуса Андрэя Краўчанку. Ён жыў ва Ўкраіне больш за 10 гадоў, але ўкраінскага пашпарта так і не атрымаў. Паведамляецца, што Андрэй Краўчанка загінуў 23 жніўня 2022 году. У яго засталіся чацьвёра дзяцей і жонка. Раней ягонае прозьвішча сярод загінулых ва Ўкраіне беларусаў не называлася. Яго пахавалі пад украінскім сьцягам.

Дакладная колькасьць грамадзян Беларусі, якія ваявалі ва ўкраінскім войску і загінулі ва Ўкраіне, невядома. Розныя крыніцы называюць ад 30 да больш чым 40 загінулых беларусаў-добраахвотнікаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG