Як піша расейскае выданьне падмаскоўных Мыцішчаў «Родники», усюдыход «Ніва» перадалі 180-му дэсантна-штурмавому палку «ад беларускага горада-пабраціма Жодзіна».
«Сяброўства з Жодзіна нас зьвязвае даўно. Мы ня толькі разам адзначаем дні нашых гарадоў, але і дапамагаем адзін аднаму. Асабліва цяпер, калі Расея вядзе барацьбу з нэафашызмам у зоне СВА», – заявіла кіраўніца адміністрацыі расейскіх Мыцішчаў Юлія Купецкая, якая прывезла «Ніву» ў зону ваенных дзеяньняў.
Раней гэтую «Ніву» перадалі ўладам падмаскоўнага гораду старшыня Жодзінскага гарвыканкаму Дзьмітрый Забалоцкі і дырэктар жодзінскай кампаніі «БАЗт’юб» (частка холдынгу «БАЗ») Аляксандар Шчурок. Яны самі прыгналі яе ў Мыцішчаў, праехаўшы дзеля гэтага больш як 600 км.
- У Беларусі шэраг ініцыятываў зьбіраюць дапамогу расейскай арміі ды жыхарам акупаваных тэрыторыяў. Раней Свабода паведамляла, што ў менскім Сьвята-Елісавецінскім манастыры дзейнічае група «Дапамога братам», заснаваньне якой блаславіў протаярэй Андрэй Лемяшонак. Удзельнікі зьбіраюць расейскім жаўнерам грошы, мэдыкамэнты, адзеньне і абутак, а таксама лісты падтрымкі. У студзені сёлета Аляксандар Лукашэнка дзякаваў кляштару за збор дапамогі расейскім вайскоўцам ва Ўкраіне.
