Пілётны праект па аптымізацыі колькасьці работнікаў бюджэтных арганізацый мае на мэце «павышэньне эфэктыўнасьці расходаваньня сродкаў рэспубліканскага і мясцовых бюджэтаў», гаворыцца ў пастанове Савета міністраў, апублікаванай 4 лютага на Нацыянальным прававым інтэрнэт-партале.
Кіраўнікі вызначаных Саўмінам арганізацый скароцяць штатныя адзінкі і ўскладуць працу, якую яны выконвалі, на іншых супрацоўнікаў. Пры гэтым кіраўнік мусіць вызначыць «аптымальную нагрузку» для работнікаў, якую яны змогуць выконваць за звычайны працоўны дзень «бяз шкоды тэрмінам і якасьці выкананых работ», гаворыцца ў пастанове.
Згодна з дакумэнтам, скарачэньне штатаў плянуюць у 26 бюджэтных установах па ўсёй Беларусі:
- дзіцячы садок № 110 г. Гомля,
- санаторны дзіцячы садок № 14 г. Гомля,
- дзіцячы садок № 6 г. Фаніпаля,
- сярэдняя школа № 4 г. Стоўбцы,
- цэнтар творчасьці «Эвэрэст» г. Магілёва,
- Смаргонскі раённы цэнтар творчасьці дзяцей і моладзі,
- Крупская цэнтральная раённая бальніца,
- Любанская цэнтральная раённая бальніца,
- 1-я цэнтральная раённая клінічная паліклініка Цэнтральнага раёну Менску,
- 38-я гарадзкая клінічная паліклініка,
- Берасьцейская дзяржаўная абласная вучэльня алімпійскага рэзэрву,
- Наваполацкая дзяржаўная вучэльня алімпійскага рэзэрву,
- Наваградзкая дзіцяча-юнацкая спартыўная школа № 2,
- тэрытарыяльны цэнтар сацыяльнага абслугоўваньня насельніцтва Менску,
- Капыльскі тэрытарыяльны цэнтар сацыяльнага абслугоўваньня насельніцтва,
- Дзяржынскі тэрытарыяльны цэнтар сацыяльнага абслугоўваньня насельніцтва,
- Пухавіцкі псыханэўралягічны дом-інтэрнат для састарэлых і інвалідаў,
- дом-інтэрнат для пэнсіянэраў і інвалідаў у Менску,
- дзіцячы дом-інтэрнат для дзяцей-інвалідаў з асаблівасьцямі псыхафізычнага разьвіцьця ў Менску,
- Рэчыцкі раённы цэнтар культуры і народнай творчасьці,ю
- Наваградзкая раённая бібліятэка,
- Заслаўская дзіцячая школа мастацтваў,
- Дзіцячая школа мастацтваў і вакальна-харавога майстэрства Горкі,
- Дзяржаўны архіў грамадзкіх аб’яднаньняў Горадзенскай вобласьці,
- Дзяржаўны архіў грамадзкіх абʼяднаньняў Магілёўскай вобласьці,
- Занальны дзяржаўны архіў у Крычаве.
У Саўміне запэўніваюць, што работніку ня змогуць даць дадатковую нагрузку «безь ягонай пісьмовай згоды» і што ён зможа «датэрмінова адмовіцца выконваць дадатковую работу».
Экспэрымэнт працягнецца да 15 сьнежня 2024 году. Па яго заканчэньні кіраўнікі гэтых арганізацый мусяць даць справаздачу аб зэканомленых у выніку аптымізацыі штату сродках, а дзяржаўныя органы разам з аблвыканкамамі і Менскім гарвыканкамам прааналізуюць вынікі і ўнясуць прапановы па пераглядзе тыпавых штатаў, нарматываў колькасьці і памераў надбавак работнікам бюджэтных арганізацый. Іх разгледзяць Міністэрствы працы і сацыяльнай абароны і Мінфін і да 15 сьнежня 2024 году ўнясуць адпаведныя прапановы ў Саўмін.
