У судзе Барысаўскага раёну 19 кастрычніка вынесьлі прысуд палітзьняволенаму актывісту Зьмітру Дашкевічу, які павінен быў выйсьці на волю з папраўчай калёніі № 14 па заканчэньні тэрміну 11 ліпеня 2023 года.
Але адразу па выхадзе яго затрымалі ў межах новай крымінальнай справы паводле арт. 411 Крымінальнага кодэксу («Злоснае непадпарадкаваньне патрабаваньням адміністрацыі калёніі»).
Судзьдзя Тацяна Дзеравянка прызначыла палітвязьню яшчэ адзін год калёніі ва ўмовах строгага рэжыму.
Пра гэта паведаміла ў Facebook жонка палітвязьня Наста Дашкевіч.
Зь іншых крыніц вядома, што суд, які пачаўся на мінулым тыдні, 11 кастрычніка, доўжыўся больш за тры дні.
У справе, паводле Насты Дашкевіч, напісалі, што нібыта «Зьміцер ня выйшаў на прагулку, адзін раз з кімсьці паразмаўляў, ляжаў на падлозе ў ізалятары пасьля начнога змаганьня з холадам».
«За гэта мой муж атрымаў 1 год строгага рэжыму. А дзеці атрымалі яшчэ адзін год бяз бацькавай любові»,— напісала Наста.
Перасьлед Зьмітра Дашкевіча
Зьміцер Дашкевіч, якому ў 2022 годзе прысудзілі 1,5 года зьняволеньня, адбываў пакараньне ў папраўчай калёніі № 14 у Навасадах і мусіў выйсьці на волю 11 ліпеня, але на яго завялі новую крымінальную справу паводле арт. 411. КК («Злоснае непадпарадкаваньне патрабаваньням адміністрацыі папраўчай установы»).
Тады ж стала вядома, што на час сьледзтва палітвязьня з Навасадаў перавялі ў жодзінскае СІЗА. Паводле дасьведчаных крыніц, у СІЗА Жодзіна на Зьмітра Дашкевіча аказваюць моцны ціск, ён часта сядзіць у карцары.
На волі ў Зьмітра Дашкевіча чацьвёра непаўналетніх дзяцей, якіх глядзіць ягоная жонка Наста, таксама асуджаная Маскоўскім раённым судом — на 3 гады хатняй «хіміі».
Зьміцер Дашкевіч у 2012 годзе ўжо быў асуджаны дадаткова на год калёніі паводле 411-га артыкулу КК. Гэта адбылося пасьля таго, як Дашкевіч адбыў 2 гады, прызначаныя судом за «хуліганства», якое ён нібыта ўчыніў за дзень да прэзыдэнцкіх выбараў 2010 году ў Менску.
Паводле пазьнейшага расьсьледаваньня ByPol, інцыдэнт, у выніку якога Зьміцер Дашкевіч разам з маладафронтаўцам Эдуардам Лобавым трапіў за краты, быў правакацыяй сілавікоў.
