«Яна ёсьць, гэтая лінія: дзяржаўная мяжа. І вы ведаеце, што ў нас ёсьць чым адказаць. Таму давайце жыць дружна, па-суседзку, як гэта было ў лепшыя часы нашай гісторыі», – сказаў Лукашэнка, зьвяртаючыся да «народаў суседніх дзяржаў».
На думку Лукашэнкі, «дзеля сяброўства з польскім народам мы перасягнулі праз гэты боль» – акупацыю палякамі Заходняй Беларусі і ганеньні на беларусаў. «За Бугам гэта прынялі за слабасьць. Але ўрок вывучаны. Час паказаў, што наша высакароднае імкненьне жыць у міры суседзі не ацанілі. Я не кажу пра польскі народ. Кажу пра эліты, палітыкаў, якія ўсе гэтыя гады прагнуць рэваншу», – заявіў ён.
Лукашэнка запэўніў, што беларусы – «самая міралюбная нацыя на зямлі» і заявіў, што краіна не пагражае суседзям ядзернай зброяй і «вагнэраўцамі».
- «Дзень народнага адзінства» адзначаецца трэці год запар у гонар уводу Чырвонай арміі на тэрыторыю Заходняй Беларусі ў адпаведнасьці з пактам Молатава-Рыбэнтропа 17 верасьня 1939.
