Рэсурс dev.by апытаў беларусаў (пераважна айцішнікаў), якім чынам ім у 2023 годзе ўдалося вывесьці альбо вывезьці грошы, якія перавышаюць ліміт у 10 тысячаў даляраў.
Польшча. SWIFT
«Прадаў у красавіку аўтамабіль, выводзіў грошы ў Польшчу Swift-пераводам з „Альфа Банка“ у PKO (абодва рахункі — у эўра). Камісія на той момант склала 150 беларускіх рублёў (калісьці была 30, але за месяц да майго пераводу расцэнкі паднялі). Грошы дайшлі за 15 хвілін».
«Пераводзіла ў красавіку € 70К за продаж кватэры ў польскі PKO праз „Альфа Банк“. З боку „Альфы“ — € 200 камісіі (600 рублёў на той момант). Грошы дайшлі за гадзіну».
Італія. SWIFT + кэш
«У студзені пераводзіў грошы зь Беларусі ў Італію праз „Парытэтбанк“ і „Белсьвісбанк“. Сумы пераводаў складалі ад €5К, камісіі — ад 1% да 3%. Італьянскі Volksbank камісію не прад’яўляў, пад падаткі нашы ўкладаньні не падпалі. Грошы прыходзілі на наступны дзень ці празь дзень. У траўні я вывез празь мяжу з Польшчай наяўныя грошы — € 80К, з сабой у мяне была дамова на продаж кватэры. На мяжы сам прымусіў нашых мытнікаў запоўніць дэклярацыю і пералічыць купюры. Было вельмі доўга. На польскім баку — крыху хутчэй».
Кэш. Польшча.
«Увесну зьяжджала ў адпачынак на тры тыдні і ўзяла з сабой буйную суму наяўнымі — $30К: ня ведаю, навошта гэтулькі, мусіць, на ўсякі выпадак, калі раптам адключаць карты. Пасьля адключэньня Расеі ад Swift я памятаю, што і беларусаў могуць у любы момант адключыць — таму з сабой павінны быць наяўныя. У менскім аэрапорце прайшло без праблем».
«Каля $80К ад продажу кватэры перавозіла вясной зь Беларусі ў Польшчу цешча па генэральнай даверанасьці ад жонкі (кватэра была ва ўласнасьці жонкі), аформленай яшчэ да нашага адʼезду. Мытнікі-палякі доўга мучылі яе, не хацелі запаўняць дэклярацыю на жонку (хоць фактычна яна ўладальнік сродкаў) і спрабавалі скласьці на цешчу. Але яна настойвала на сваім. На беларускай мытні таксама былі праблемы, бо і яны ня ведаюць, як выконваць працу, якая крыху адрозьніваецца ад стандартнага «Papers, please».
«Месяц таму прадала кватэру. Перад угодай пракансультавалася на мяжы наконт дакумэнтаў, якія спатрэбяцца, каб вывезьці больш за $100К. Палякі папрасілі задэкляраваць грошы пры ўвозе, беларусы сказалі, што патрэбная дэклярацыя, пашпарт угоды, імянная даведка з банку, калі такая буйная сума будзе ў валюце.
Нібы ўсё зразумела і ясна. А насамрэч такую даведку ў банку не даюць — даюць толькі чэк ад продажу рублёў і куплі валюты. На просьбу выдаць нешта з таго, што запатрабуюць на мяжы, адказалі: „Яны нам павінны запыт даслаць. 5 працоўных дзён на адказ“. Я не рызыкнула перавозіць усе грошы, узяла $70К, задэкляравала іх.
Добра, што беларускія мытнікі папярэдзілі, што трэба дэкляраваць увогуле ўсе грошы — у тым ліку тое, што ў кашальку і ў кішэнях, таму што вывернулі ўсё — кожную кішэню на вопратцы, заплечнікі, сумкі...»
Ізраіль (праз Грузію).
«Вывозіў $50K самалётам праз Тбілісі ў Тэль-Авіў. У менскім аэрапорце запоўніў дэклярацыю — без праблем. З сабой былі дакумэнты аб паходжаньні сродкаў — працоўныя кантракты гадоў за 10, а таксама выпіскі з банку, — але нічога з гэтага не запатрабавалі, толькі пералічылі грошы».
Зьняцьцё з карты ў банкамаце за мяжой. Нямеччына
«Здымаў з красавіка па жнівень наяўныя ў замежным банкамаце з карты «Альфа Банку» (пакет Black). З кожнай карты можна зьняць да €2,5К у месяц без камісій — думаю, сумарна за паўгода я зьняў €10K».
