Адміністрацыя прэзыдэнта ЗША Джо Байдэна ўпершыню вырашыла паставіць ва Ўкраіну бранябойныя снарады, якія зьмяшчаюць зьбеднены ўран, паведамляе агенцтва Reuters, якое атрымала магчымасьць азнаёміцца з тэкстам адпаведнага дакумэнта.
Аб прыняцьці рашэньня паведамілі агенцтву і дзьве іншыя афіцыйныя крыніцы.
Снарады, здольныя прабіць браню расейскіх танкаў, увайшлі ў новы пакет амэрыканскай ваеннай дапамогі Ўкраіне. Пра гэты пакет будзе аб’яўлена на наступным тыдні.
Снарады, пра якія ідзе гаворка, могуць прымяняцца пры стральбе з гарматаў, якімі ўзброеныя танкі Abrams. Як паведаміла крыніца, зьвязаная з наданьнем ваеннай дапамогі Ўкраіне, партыя танкаў Abrams паступіць ва Ўкраіну «ў бліжэйшыя тыдні».
Снарады са зьбедненым уранам валодаюць лепшай бранябойнасьцю, чым звычайныя. Зьбеднены ўран — гэта адходы працэсу ўзбагачэньня ўрану. Ён таксама можа выкарыстоўвацца пры вытворчасьці ядзернай зброі.
Раней Украіна ўжо атрымала снарады гэтага тыпу ад Вялікай Брытаніі — для абсталяваньня брытанскіх танкаў «Чэленджэр-2». Расея тады назвала гэты крок «сурʼёзнай эскаляцыяй канфлікту». «Гэта шырока распаўсюджаны тып боепрыпасаў, які выкарыстоўваецца дзесяцігодзьдзямі з прычыны яго бранябойных уласьцівасьцяў», — заявіў у адказ прадстаўнік Рады нацыянальнай бясьпекі ЗША Джон Кірбі, падкрэсьліўшы, што гэтыя снарады не радыяактыўныя і не адносяцца да ядзернай зброі.
