Усе трое на працягу апошніх гадоў выносілі прысуды ў справах, якія праваабаронцы прызналі палітычна матываванымі.
- Алена Рудніцкая вядомая працэсамі над удзельнікамі пасьлявыбарчых пратэстаў у 2010 годзе. Яна ж была судзьдзёй на судзе адлічанага з БДУ лідэра «Моладзі БНФ» Юрася Лукашэвіча супраць унівэрсытэту. Таксама Рудніцкая адмовіла заяўніку Дня Волі ў пазове да Менгарвыканкаму, разглядала пазоў «Мілкавіты» супраць журналіста Юрася Карманава. Пасьля выбараў 2020 году яна вяла працэс, падчас якога ліквідавалі клюб плаваньня Аляксандры Герасімені, якая ў той час узначальвала Фонд спартыўнай салідарнасьці.
- Максім Філатаў знаходзіцца пад санкцыямі Эўразьвязу. Ён вядомы тым, што асудзіў на 5 год зьняволеньня актывіста зь Бярозаўкі Вітольда Ашурка, які пазьней пры нявысьветленых абставінах загінуў у шклоўскай калёніі. Ён жа выносіў прысуды ў гучнай «справе Аўтуховіча». У ёй было 12 фігурантаў. Нядаўна ён прысудзіў турэмныя тэрміны горадзенскаму журналісту Паўлу Мажэйку і адвакатцы Юліі Юргілевіч.
- Руслан Царук прызначыў гамяльчанцы Анастасіі Петрачэнцы тры гады калёніі за данат палку імя Каліноўскага. Ён выносіў прысуды за камэнтары ў сацыяльных сетках, па абвінавачаньнях у нібыта агентурнай дзейнасьці на карысьць Украіны, у «справе Зельцара» і за фатаграфаваньне расейскай вайсковай тэхнікі на беларускай тэрыторыі.
