Апазыцыйныя дэпутаты ў Кнэсэце байкатавалі апошняе галасаваньне, аднак галасоў 64 дэпутатаў кіроўнай кааліцыі аказалася дастаткова для прыняцьця закону. Ён абмяжоўвае права Вярхоўнага суду адмяняць рашэньні, прынятыя ўрадам (які фармуецца з дэпутатаў). На думку крытыкаў, папраўкі ствараюць магчымасьці для злоўжываньняў уладай, ліквідуючы адзін зь нешматлікіх эфэктыўных мэханізмаў кантролю за ўрадам.
Іншыя папраўкі, за якія ў панядзелак не галасавалі, прадугледжваюць зьмену працэдуры прызначэньня судзьдзяў Вярхоўнага суду. Апазыцыя ўпэўненая, што законы судовай рэформы прывядуць да зьнікненьня незалежнай судовай сыстэмы.
Падчас пасяджэньня Кнэсэту ля будынку, дзе адбывалася галасаваньне, адбывалася дэманстрацыя пратэсту, у ёй удзельнічалі 20 тысяч чалавек. Паліцыя ўжыла вадамёты, каб адагнаць удзельнікаў, паведамляецца пра 19 затрыманых.
Да пратэстаў далучыўся буйны бізнэс. Ізраільскі бізнэс-форум, які аб’ядноўвае кіраўнікоў 150 найбуйнейшых кампаніяў краіны, абвясьціў страйк супраць рэформы. Да страйку далучыліся многія стартапы, банкі, гандлёвыя цэнтры і аўтазаправачныя станцыі.
У панядзелак міністар фінансаў Ізраілю Бецалель Смотрыч прапанаваў адкласьці галасаваньне па папраўках мінімум на паўгода. Ініцыятыву адхілілі. На прыняцьці законаў у нязьменным выглядзе і неадкладна настойваюць ультракансэрватыўныя чальцы кіроўнай кааліцыі, якія абяцаюць у адваротным выпадку выйсьці зь яе складу, што непазьбежна прывядзе да шостых за 4 гады парлямэнцкіх выбараў.
