Служба дзяржбясьпекі Грузіі назвала асноўныя прычыны, зь якіх іншаземцам, у тым ліку беларусам, можа быць адмоўлена ва ўезьдзе ў краіну. У справаздачы, пададзенай парлямэнту, пазначана, што ў Грузію не ўпусьцілі «сотні» замежных грамадзян. Аб гэтым са спасылкай на дакумэнт піша newsgeorgia.ge.
Сярод асноўных прычын, зь якіх іншаземцы ня могуць трапіць у Грузію, СДБ называе:
- парушэньне заканадаўства Грузіі аб акупацыі (наведваньне самаабвешчанай Абхазіі і Цхінвальскага рэгіёну);
- калі паступіла інфармацыя-папярэджаньне ад краін-партнэраў;
- апэратыўная інфармацыя аб плянаваньні правакацыйных дзеяньняў;
- апэратыўная інфармацыя аб адкрытым выказваньні ўстановак, якія наносяць шкоду інтарэсам Грузіі.
У ведамстве дадалі, што летась у Грузіі выявілі некалькі іншаземцаў, якія спрабавалі атрымаць «пэўную катэгорыю інфармацыі» і рабілі падазроныя фота і відэа розных абʼектаў, у тым ліку стратэгічных і рэжымных. Іх дзейнасьць на тэрыторыі Грузіі была абмежаваная.
З выпадкамі адмовы ва ўезьдзе ў Грузію пэрыядычна сутыкаюцца грамадзяне Беларусі, у тым ліку тыя, хто ўжо пэўны час пражываў у краіне. Пры гэтым ім звычайна не тлумачаць прычыны адмовы.
Так адбылося, напрыклад, з заснавальнікам беларускай дыяспары Аджарыі, айцішнікам Яўгенам Гацаком. Увесну ён адправіўся ў Турэччыну, каб «абнуліць візу» (іншаземцам без ДНЖ у Грузіі трэба выяжджаць раз на год, потым можна вярнуцца і жыць яшчэ год). Але на зваротным шляху яму адмовілі ва ўезьдзе ў Грузію «зь іншых прычынаў».
На наступны дзень ён паспрабаваў паўторна ўехаць у Грузію і, зноўку атрымаўшы адмову, запрасіў міжнародную абарону. Цяпер беларус разам зь сямʼёй знаходзіцца ў Польшчы.
Падобныя выпадкі ўжо здараліся і раней, у тым ліку зь фігурантамі палітычных крымінальных спраў, заведзеных у Беларусі. Як расказаў беларускі юрыст, праваабаронца, прадстаўнік беларускай дыяспары Аджарыі Раман Кісьляк, «гісторый, якія не выходзяць на публіку, шмат».
