Лінкі ўнівэрсальнага доступу

Лукашэнка падпісаў Закон аб СМІ. Замежным СМІ зь «недружалюбных» краін пагражае забарона


Ілюстрацыйнае фота
Ілюстрацыйнае фота

Закон прадугледжвае магчымасьць увядзеньня забароны на дзейнасьць замежных СМІ на тэрыторыі Беларусі ў «выпадку праявы замежнымі дзяржавамі недружалюбных дзеяньняў у адносінах да беларускіх СМІ».

Савет міністраў, які распрацаваў законапраект, сьцьвярджаў, што закон уводзіцца ў якасьці «сымэтрычных мер» на блякіроўкі доступу да беларускіх СМІ краінамі Захаду.

Пашыраецца пералік падставаў для ануляваньня пасьведчаньня аб дзяржаўнай рэгістрацыі СМІ і абмежаваньня доступу да інтэрнэт-рэсурсу, сеткавага выданьня, агрэгатара навін, паведамляе сайт president.gov.by.

Паводле закону, будуць вызначацца «асаблівасьці функцыянаваньня навінавых агрэгатараў і прававы статус іх уладальнікаў».

Дэталізуюцца абмежаваньні для інтэрнэт-рэсурсаў, якія распаўсюджваюць прадукцыю тэлевізійных і радыёвяшчальных мэдыяў.

  • Падчас абмеркаваньня новай рэдакцыі Закон ў Палаце прадстаўнікоў у красавіку 2023 дэпутаты казалі пра неабходнасьць «абараняць нацыянальную інфармацыйную прастору Беларусі». «І вычышчаць з галавы нашага пакаленьня гэтае трызьненьне! – настойваў тады дэпутат Алег Гайдукевіч. – Лухта, якую нам забівалі ў канцы 80-х і пачатку 90-х. Яна дагэтуль у некаторых сядзіць. Вось гэтыя казкі: «свабода слова» – лухта гэта!»
  • У Закон аб СМІ, прыняты ў 2008 годзе, пэрыядычна дадавалі зьмены, апошні раз – у 2021-м. Навацыі тады пашырылі пералік інфармацыі, забароненай для распаўсюджаньня ў СМІ.
  • У Беларусі практычна не засталося незалежных грамадзка-палітычных СМІ. Многія рэдакцыі пасьля разгрому (ператрусы, канфіскацыя тэхнікі, арышты, блякіроўка) альбо закрыліся, альбо працуюць за мяжой. За кратамі знаходзяцца 34 прадстаўнікі СМІ.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG