Акруговая пракуратура ў Познані завяршыла расьсьледаваньне ў дачыненьні да двух беларусаў, якіх падазраюць у шпіёнскай дзейнасьці на захадзе Польшчы. Абвінаваўчае заключэньне перадалі ў акруговы суд.
Беларусаў затрымалі ў красавіку 2022 году. Пракуратура заяўляе, што падазраваныя прыехалі ў Польшчу на падставе працы кіроўцамі. Спэцслужбы высьветлілі, што мужчыны рабілі выгляд, нібы шукаюць працу, а насамрэч шпіёнілі на карысьць беларускай вайсковай выведкі.
Як гаворыцца ў паведамленьні акруговай пракуратуры, мужчыны зьбіралі інфармацыю пра Ўзброеныя сілы Польшчы і аб’екты інфраструктуры, якія «маюць вырашальнае значэньне для абароны краіны».
Цяпер яны пад вартай. Ім пагражае да 10 гадоў пазбаўленьня волі.
