У Дубровенскім раёне за апошні месяц пачасьціліся затрыманьні кіроўцаў, якія рухаюцца транспартам па трасе М1 з боку Расеі альбо ў адваротным кірунку, паведамляе Праваабарончы цэнтар «Вясна».
У грамадзян Беларусі правяраюць тэлефоны, шукаюць «экстрэмісцкія» падпіскі ў тэлеграм-каналах і чатах. Некаторых затрымліваюць і адвозяць у Дуброўна, дзе заводзяць адміністрацыйныя справы і судзяць па арт. 19.11 КаАП.
Вядома, што 21 траўня затрымалі жыхара Магілёва. Яму прысудзілі штраф у памеры 1110 рублёў і канфіскавалі тэлефон.
А 24 траўня затрымалі яшчэ дваіх беларусаў і асудзілі на 15 дзён адміністрацыйнага арышту кожнага.
5 траўня Беларусь увяла памежны кантроль на сухапутнай мяжы з Расеяй. У тых, хто ўяжджае ў краіну на аўтамабілях, пачалі правяраць дакумэнты і багажнікі машын.
Старшыня КДБ Іван Тэртэль 1 чэрвеня пракамэнтаваў праверкі на межах Беларусі, падчас якіх у людзей правяраюць тэлефоны і дапытваюць:
«Гэтая мера рэалізуецца цяпер па ўсім пэрымэтры беларускай мяжы. Яна накіравана на своечасовае выяўленьне і лякалізацыю дзейнасьці асоб, якія выношваюць тэрарыстычныя, экстрэмісцкія памкненьні ў адносінах да Беларусі», — сказаў старшыня КДБ.
Паводле яго, КДБ «атрымлівае інфармацыю аб наяўнасьці рэальных плянаў сярод асоб з баявых груп, сфармаваных на тэрыторыі Ўкраіны, Польшчы, Літвы, Чэхіі, некаторых іншых краін, аб учыненьні тэрактаў у Беларусі».
- Расея пачала поўнамаштабнае ваеннае ўварваньне на тэрыторыю Ўкраіны 22 лютага 2022 году.
- Кіраўніцтва Беларусі падтрымала расейскую агрэсію і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
- Тэрыторыя Беларусі і пазьней актыўна выкарыстоўвалася расейскім войскам для нанясеньня ўдараў па Ўкраіне ў асобныя пэрыяды.
