Чартанаўскі раённы суд Масквы арыштаваў на 15 дзён грамадзяніна Беларусі Дзьмітрыя Галаўлёва, затрыманага ў Маскве 22 траўня пасьля запуску бела-сініх паветраных шарыкаў і бела-сіня-белага сьцяга, паведамляе «ОВД-Инфо».
Яго прызналі вінаватым у дробным хуліганстве. Галаўлёў, паводле рашэньня суду, нібыта прызнаў віну ў тым, што «каля пад’езда лаяўся нецэнзурнай лаянкай, быў нецьвярозы». Арышт прызначылі 23 траўня.
Як паведамляе «Медиазона», спасылаючыся на сябра Галаўлёвых, сувязі з мужам і жонкай няма з учорашняй раніцы, іх тэлефоны выключаныя. Іх не змаглі знайсьці ў ніводным са спэцпрыёмнікаў Масквы, дзе яны цяпер — невядома.
У пары двое дзяцей, аднаму зь іх менш за шэсьць месяцаў.
Дзьмітрыя Галаўлёва разам зь ягонай жонкай Юліяй затрымалі 22 траўня ў маскоўскім раёне Бірулёва пасьля запуску бела-сіня-белага сьцяга ў неба над раёнам Чартанава ў Маскве.