Праваабаронцы: нехта зладзіў правакацыю супраць Марыі Калесьнікавай
У гомельскай калёніі нехта зладзіў правакацыю супраць Марыі Калесьнікавай, паведамляе праваабарончая група MAYDAY TEAM.
Паводле інфармацыі праваабаронцаў, па вяртаньні з мэдчасткі хтосьці падсыпаў ёй таблеткі ў ёмістасьць з кавай. Пасьля ў камэры зладзілі ператрус: супрацоўнікі калёніі знайшлі таблеткі і адправілі Марыю ў штрафны ізалятар.
Як мяркуюць праваабаронцы, гэта мог зрабіць нехта з сукамэрнікаў Марыі.
Учора зьявілася інфармацыя, што Марыя Калесьнікава ў калёніі мае праблемы са здароўем, таму не працуе.
Палітвязень Дзьмітры Паўтарак арыштаваны на 20 сутак
Нядаўна на праўладным тэлеграм-канале з палітвязьнем зьявілася «пакаяльнае відэа», заўважыла «Вясна».
Актывіст Ільля Міронаў паведаміў у фэйсбуку, што адбываў «суткі» разам зь Дзьмітрыем Паўтаракам. Паводле яго, Дзьмітрыя затрымалі 6 траўня. Спачатку яго асудзілі паводле арт. 19.11 КаАП (распаўсюд экстрэмісцкіх матэрыялаў) на 10 дзён арышту, а потым дадалі яшчэ 10 дзён. Цяпер ён у гомельскім ізалятары часовага ўтрыманьня.
Дзьмітрыя Паўтарака асудзілі на 3 гады «хіміі» паводле арт. 342 КК. Ад сакавіка ён адбывае тэрмін у гомельскай папраўчай установе адкрытага тыпу № 17. Дзьмітры — сірата. 1 чэрвеня ён адзначыць 36-годзьдзе.
