Лякаматыўныя брыгады Беларускай чыгункі могуць адмовіцца выконваць рэйсы ў Расею, аднак за гэта пагражае звальненьне. Пра гэта «Белсату» паведамілі аўтары Telegram-каналу «Супольнасьць чыгуначнікаў Беларусі».
У выніку «партызанскай акцыі» цеплавоз БЧ атрымаў сур’ёзныя пашкоджаньні. У «Супольнасьці чыгуначнікаў Беларусі» мяркуюць, што рамантаваць яго ня будуць праз эканамічную нявыгаднасьць, а разрэжуць на мэталялом. Фота зь месца здарэньня сьведчыць, што лякаматыў гарэў. Паводле афіцыйных зьвестак, машыніст і ягоны памочнік не пацярпелі.
«Пазьбегнуць ахвяраў з боку лякаматыўнай брыгады дэпо Гомель удалося толькі дзякуючы шчасьліваму зьбегу абставінаў», — адзначыў канал у сваім паведамленьні.
Цяпер, калі небясьпека службовых паездак у Расею стала відавочнай, нельга выключаць адмоваў ад рэйсаў у суседнюю краіну. Пры гэтым наўрад ці зьява будзе масавай.
«Страх езьдзіць туды, вядома ж, ёсьць. Аднак ціск кіраўніцтва і страх страціць працу, ды даволі высокія для Беларусі заробкі — гэта можа стаць вызначальным», — адзначаюць аўтары каналу.
Машыністы не выбіраюць, куды ім ехаць: рэйсы прызначае нарадчык. Адмовіцца, натуральна, можна, аднак ня без наступстваў:
«Калі звычайны цягнік — звальненьне празь невыкананьне службовых абавязкаў, а калі вайсковы эшалён, могуць і крымінальную справу завесьці за нібыта здраду дзяржаве».
Пры гэтым за рэйсы за мяжу беларускім чыгуначнікам прэміяў не выпісваюць: «Надбавак няма, тарыф аднолькавы».
Здарэньне ў Бранскай вобласьці адбылося 1 траўня. Паводле зьвестак Расейскай чыгункі, з рэек сышлі 7 вагонаў і цеплавоз, які загарэўся. Гэта быў беларускі цягнік, ён вёз з Гомля нафтапрадукты і будаўнічыя матэрыялы. Расейскае выданьне «Baza» паведаміла, што на месцы было тры выбухоўкі.
2 траўня ў Бранскай вобласьці пусьцілі пад адхон ужо другі цягнік. На перагоне Сьняжэцкая — Белыя Берагі ў выніку выбуху сышлі з рэек лякаматыў і грузавыя вагоны. Пра ахвяры ўлады не паведамляюць.
