Музыкі былі арыштаваныя на 10 сутак за «распаўсюд экстрэмісцкіх матэрыялаў» (арт.19.11 КаАП). Яны адбывалі пакараньне ў гомельскім ізалятары часовага ўтрымання. Пра затрыманьне Раманава стала вядома 6 красавіка.
- Паводле інфармацыі Беларускага ПЭНа, на 31 сакавіка ў Беларусі 137 дзеячаў культуры знаходзілася ў няволі.
- У маніторынгу ПЭНа аб парушэньнях правоў чалавека ў сфэры культуры падкрэсьліваліся асобныя факты палітычнага крымінальнага перасьледу: закрыты суд над Паўлам Белавусам, прысуды дасьледчыцам Валерыі Касьцюговай і Тацьцяне Кузінай (10 гадоў пазбаўленьня волі), сям’і музыкаў гурта Litesound Каракіных (ад 2,5 да 3 гадоў абмежаваньня волі без накіраваньня ў папраўчую ўстанову адкрытага тыпу) і інш.
- Аўтары дасьледаваньня канстатавалі, што ў другой палове сакавіка працягваліся палітычна матываваныя адміністрацыйныя затрыманьні і арышты дзеячаў культуры, аўтараў і выканаўцаў. Так, 29-31 сакавіка ў Полацку (Віцебская вобласьць) прайшлі ператрусы і затрыманьні (11 чалавек) супрацоўнікаў мясцовага гісторыка-культурнага музея-запаведніка.
- Акрамя таго, у гэты пэрыяд фіксаваліся факты арыштаў і судоў за беларускую і ўкраінскую нацыянальную сымболіку, працягваліся рэпрэсіі ў кніжнай сфэры.
- Раней Беларускі ПЭН паведамляў, што ў 2022 годзе зафіксавана не менш за 1.390 парушэньняў культурных правоў і правоў чалавека ў дачыненьні да дзеячаў культуры. На канец мінулага года ў краіне налічвалася 108 палітзьняволеных дзеячаў культуры.
