Прэм’ер-міністарка Літвы Інгрыда Шыманіце і Канстантынопальскі патрыярх Варфаламей на падпісаньні пагадненьня ў Вільні
Размова падчас візыту ішла аб заснаваньні мясцовай структуры Усясьветнага патрыярхату. Сустрэча скончылася падпісаньнем дакумэнтаў.
Візыт Усясьветнага (Канстантынопальскага) патрыярха Варфаламея ў Вільню скончыўся падпісаньнем пагадненьня зь літоўскімі ўладамі. Пагадненьне прадугледжвае канкрэтныя крокі па інстытуцыялізацыі ў краіне структур Усясьветнага патрыярхату, адкрываючы для іх магчымасьці будаваць і бязвыплатна арэндаваць у дзяржавы храмавыя памяшканьні, ажыцьцяўляць місіянэрскую, адукацыйную і дабрачынную дзейнасьць.
Клірыкі Усясьветнага патрыярхату ў Літве атрымаюць такі ж прававы статус, як і святары іншых традыцыйных канфэсій Літвы.
Дакумэнт з Канстантынопальскім патрыярхатам падпісвала прэм'ер-міністарка Літвы Інгрыда Шыманіце. Яна падкрэсьліла, што рашэньне Ўсясьветнага патрыярхату задаволіць апэляцыю пяці літоўскіх праваслаўных сьвятароў, аднавіць іх рэлігійны статус і прыняць у Царкву-Маці пасьля рашэньня патрыярха Маскоўскага Кірыла выключыць іх з духавенства, — гэта важны крок у забесьпячэньні рэлігійнай свабоды ў Літве.
Таксама яна падкрэсьліла, што рашэньне аб вяртаньні Экумэнічнага патрыярхату ў Літву можа прыняць толькі ён сам. Аднак яна адзначыла, што магчымасьць вызнаваць сваю веру без канфлікту з сумленьнем важная ня толькі для праваслаўных грамадзян Літвы грэцкага і ўкраінскага паходжаньня, але і для ўкраінцаў, якія ўцяклі ад разьвязанай Расеяй вайны, і для беларусаў, якія праз рэпрэсіі на радзіме пераехалі ў Літву.
Падчас паездкі Варфаламей сустрэўся ня толькі з прадстаўнікамі ўлады, але і з адноўленымі ў сане сьвятарамі і вернікамі.
Раней з просьбай аб заснаваньні мясцовай структуры Ўсясьветнага патрыярхату да патрыярха Варфаламея зьвярталіся розныя нацыянальныя грамады Літвы, у тым ліку беларуская і ўкраінская.
У карыстаньне праваслаўных вернікаў Канстантынопальскага патрыярхату ў Вільні перадалі храм у гонар сьвятога Мікалая ў Лукішках. Гэта адзін зь нямногіх культавых будынкаў, што гістарычна належалі Праваслаўнай царкве, але не былі перададзены ва ўласнасьць мясцовай эпархіі РПЦ, напісаў напярэдадні візыту ў сваім тэлеграм-канале айцец Аляксандар Шрамко.
Таксама ён паведаміў, што напярэдадні візыту патрыярха Канстантынопальскага ўпершыню літургія ў саслужэньні сьвятароў Канстантынопальскага патрыярхату ў Вільні прайшла ў будынку названага храма.