Лінкі ўнівэрсальнага доступу

Палітзьняволены мастак Алесь Пушкін выразаў лязом крыж на сваім целе


Алесь Пушкін на судзе
Алесь Пушкін на судзе

Рэдакцыя газэты «Новы час» атрымала расповед аднаго зь вязьняў, які апісвае зьдзекі ў турме з мастака Алеся Пушкіна падчас судовага працэсу.

Як кажа вязень, Алесь Пушкін 25 сакавіка з дапамогай ляза ад аднаразовага станка выразаў на сваім целе вялікі крыж. Дзяжурныя ўбачылі гэта на маніторы і пабілі Пушкіна гумавымі дручкамі.

«І тут сваю кемлівасьць праявілі ўжо салдаты ўнутранай службы, — працягвае расповед сьведка зьдзекаў. — Замест грубых, цяжкіх удараў, якія пакідаюць гематомы, білі хвостка і рабілі акцэнт на баявых прыёмах. Пасьля кароткага выхаваўчага працэсу крывацечныя раны сталі занадта прыкметныя, каб іх ігнараваць. І Пушкіна панесьлі, як маглі, аказваць тэрміновую мэдычную дапамогу.

Лекар выканаў сваю частку працы, зашыў і апрацаваў парэзы — і пайшоў. А значыць, выхаваўчая праца магла быць працягнутая, але зь яшчэ большай кемлівасьцю. Удар гумавай дубінкай па пятах цяжка зафіксаваць, затое ён выдатна аддае ва ўнутраныя органы, асабліва ныркі. Ці быў у гэтага этапу выхаваньня вычварнага зэка які-небудзь сэнс? Сказаць складана... Але козыраў Алесю не далі — ударамі і сінякамі „пахваліцца“ на судзе ён ужо ня мог».

Палітвязень Алесь Пушкін за кратамі з сакавіка 2021 году. 30 сакавіка 2022 году Алеся Пушкіна асудзілі на 5 гадоў калёніі строгага рэжыму (падчас закрытага працэсу ён парэзаў сабе жывот на знак пратэсту).

Крымінальную справу разглядаў Менскі гарадзкі суд, судзьдзя Алена Шылько. Мастака прызналі вінаватым у «наўмысных дзеяньнях у рэабілітацыі нацызму, учыненых групай асобаў», і ў «зьдзеку зь дзяржаўных сымбаляў». Падставай для абвінавачаньняў сталі карціны з цыклю «Беларускі супраціў» і пэрформанс, які ён правёў ва Ўкраіне. Вяртаючыся з Кіева, Пушкін ведаў, што на яго на радзіме завялі крымінальную справу.

22 лістапада 2022-га Алеся Пушкіна перавялі ў горадзенскую турму № 1 на строгі рэжым. 11 лістапада судзьдзя Івацэвіцкага раёну Аляксандар Кірыловіч пастанавіў перавесьці Пушкіна на турэмны рэжым тэрмінам на паўтара года.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG