Пра гэта паведамляюць у пятніцу агенцтвы і СМІ абедзьвюх краін.
Пагадненьню папярэднічалі перамовы, якія прайшлі ў сталіцы Кітаю Пэкіне. КНР выступіла ў якасьці пасярэдніка.
Іранскае дзяржаўнае агенцтва ІРНА паведамляе, што іранская амбасада ў Эр-Рыядзе і саудаўская ў Тэгеране адновяць працу на працягу двух месяцаў.
Адносіны паміж шыіцкім Іранам і суніцкай Саудаўскай Арабіяй у апошнія гады былі варожыя. Тэгеран і Эр-Рыяд падтрымлівалі розныя бакі кровапралітных канфліктаў у Сырыі і Емэне. У 2016 годзе былі фармальна разарваныя дыпляматычныя адносіны паміж краінамі.
Сёньня была апублікаваная сумесная заява Саудаўскай Арабіі і Ірану, у якой гаворыцца, што краіны абавязаліся ня ўмешвацца ва ўнутраныя справы адна адной.
Пра нармалізацыю адносін дзьвюх буйных краін рэгіёну абвешчана на фоне росту напружанасьці ў адносінах паміж Вашынгтонам, традыцыйным партнэрам Саудаўскай Арабіі, і Тэгеранам. Міністар абароны ЗША Лойд Остын напярэдадні падчас візыту ў Ізраіль заявіў, што Іран не павінен стаць уладальнікам ядзернай зброі.