Boeing 737-800 з бартавым нумарам EW-001PA сёньня а 14:02 маскоўскага часу вылецеў з аэрапорта «Ўнукава» і прызямліўся ў Цьвярской вобласьці РФ, сьведчаць дадзеныя сэрвісу Radarbox. Маршрут адсачыў @reformby. Ці быў на борце Аляксандар Лукашэнка, не паведамляецца.
Сэрвіс flightaware.com інфармуе, што боінг Лукашэнкі прыляцеў зь Цьвярской вобласьці ў Менск а 22:05 паводле менскага часу.
З учорашняга дня пра месца знаходжаньня Лукашэнкі нічога невядома. Апошнія паведамленьні датычыліся афіцыйнай часткі сустрэчы Лукашэнкі і Пуціна ў пятніцу.
У Цьвярской вобласьці на тэрыторыі нацыянальнага парку «Завідава» знаходзіцца дзяржаўная рэзыдэнцыя «Русь». У чэрвені 2022 году Лукашэнка ўжо быў у гэтай рэзыдэнцыі на запрашэньне Пуціна. Тады ён таксама зьнік з публічнай прасторы на некалькі дзён.
