Лінкі ўнівэрсальнага доступу

Суд у Гаазе прысудзіў экс-камандзіру арміі Косава 26 гадоў турмы за катаваньні


Саліх Мустафа
Саліх Мустафа

Спэцыяльны суд па часткова прызнаным Косаве прысудзіў былому камандуючаму Вызваленчай арміі Косава Саліху Мустафу 26 гадоў турмы. Яго прызналі вінаватым у ваенных злачынствах. Гэта першы прысуд Гааскага трыбуналу па злачынствах у Косаве, паведамляе Балканская служба Радыё Свабода.

Судзьдзі прыйшлі да высновы, што Мустафа датычны да катаваньняў, незаконных затрыманьняў і забойстваў. Па дадзеных сьледзтва, Мустафа ўзначальваў партызанскую групу, якая ўтрымлівала як мінімум шэсьць косаўскіх альбанцаў. Іх абвінавачвалі ў супрацоўніцтве з сэрбамі.

Зьняволеных білі бэйсбольнымі бітамі, токам і катавалі агнём, ім не давалі вады і ежы. Суд лічыць, што Мустафа асабіста браў удзел у катаваньнях як мінімум двух зьняволеных увесну 1999 году.

Мустафу арыштавалі ў 2020 годзе. Тады ён займаў пасаду дарадцы Міністэрства абароны Косава. Сваю віну асуджаны не прызнаў. Афіцыйна спэцыяльны суд па Косаве пачаў працу ў 2017 годзе.

Спэцыяльны суд расьсьледуе меркаваныя злачынствы, учыненыя чальцамі Вызваленчай арміі Косава супраць этнічных меншасьцяў і палітычных супернікаў у пэрыяд са студзеня 1998-га па сьнежань 2000 году.

Суд знаходзіцца ў Гаазе, але дзейнічае ў адпаведнасьці з законамі Косава.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG