Помнік зьбіраюцца паставіць на Кастрычніцкай плошчы Менску.
У Міністэрстве культуры адзначылі, што свае працы паказалі 7 скульптараў і аўтарскіх калектываў. Эксперты у сваю чаргу аберкавалі праекты і далі рэкамендацыі.
«Бачная калясальная праца, ваша энэргетыка ў дадзеных эскізах, ваша бачаньне. Самае галоўнае, што гэтае бачаньне пазытыўнае і жыцьцесьцьвярджальнае, адлюстроўвае нашу вялікую гісторыю і падкрэсьлівае сучаснае жыцьцё. Вялікі вам дзякуй», — цытуе міністра культуры Анатоля Маркевіча прэс-служба яго ведамства.
Камісіі яшчэ трэба выбраць, які з конкурсных праектаў будзе рэалізаваны.
Раней Мінкульт некалькі разлоў абвяшчаў конкурс на помнік народнаму адзінству, паколькі пераможцу вызначыць не атрымлівалася.
Што такое «Дзень народнага адзінства» ў Беларусі
Паміж СССР і Нямеччынай у жніўні 1939 году была падпісаная дамова аб новых межах і сфэрах уплыву ва Ўсходняй Эўропе («пакт Молатава — Рыбэнтропа»). 17 верасьня 1939 году савецкая Чырвоная армія, скарыстаўшыся нападам нацысцкай Нямеччыны на Польшчу, без абвяшчэньня вайны ўварвалася на тэрыторыю Заходняй Беларусі і Заходняй Украіны. Гэтыя землі ў міжваенны пэрыяд знаходзіліся ў складзе Польшчы.
Дзяржаўным сьвятам у СССР гэты дзень не лічыўся: пра «ўзьяднаньне БССР і Заходняй Беларусі» згадвалі, але стрымана і сьціпла. Ні ўрачыстых сходаў, ні мітынгаў ці парадаў у гэтыя дні не праводзілася.
7 чэрвеня 2021 году Аляксандар Лукашэнка, які ўтрымлівае ўладу ў Рэспубліцы Беларусь, заснаваў сьвята «Дзень народнага адзінства».
Рашэньне адзначаць падзеі 17 верасьня 1939 году як дзяржаўнае сьвята выклікала рэзка нэгатыўную рэакцыю ў суседзяў — у МЗС Літвы заявілі, што афіцыйны Менск «ігнаруе злачынствы, учыненыя двума самымі жорсткімі таталітарнымі рэжымамі ХХ стагодзьдзя».
У польскім МЗС заснаваньне сьвята назвалі «часткай дзеяньняў Расеі, накіраваных на пераасэнсаваньне надзвычай складанай гісторыі нашага рэгіёну». У Варшаве не сумняваюцца, што Лукашэнка выконвае тым самым расейскую палітыку перагляду складанай гісторыі рэгіёну.
Інстытут нацыянальнай памяці Польшчы назваў гэтую дату «Днём адзінства двух таталітарызмаў».
