18 кастрычніка МУС паведаміла пра 70 фактаў, калі цэны ў крамах завышалі. На гэтай падставе завялі 34 крымінальныя справы і ўжо затрымалі 20 чалавек. Ад забароны на рост цэнаў церпяць ня толькі прадуктовыя крамы.
Бізнэсовец з Магілёва
7 кастрычніка, празь дзень пасьля таго, як Лукашэнка забараніў павышаць цэны, КДК выявіў праблему з рэклямай на радыё.
Жыхар Магілёва пры разьмяшчэньні на радыёстанцыі рэклямы аднаго зь мясакамбінатаў Менскай вобласьці атрымаў за аказаную паслугу ўзнагароджаньне ў 10 разоў большае, чым панесеныя затраты, і тым самым нанёс страты прадпрыемству. Сілавікі завялі крымінальную справу, а прадпрымальніка затрымалі.
Пастаўшчыкі кампутарнага абсталяваньня
Таксама сілавікі знайшлі парушэньні ў аднаго з буйных пастаўшчыкоў кампутараў і кампутарных паслуг.
«Выяўленыя факты неабгрунтаванага завышэньня цэнаў і ўтойваньня выручкі ад рэалізацыі кампутараў, кампутарнага абсталяваньня і праграмнага забесьпячэньня пры праверцы аднаго з буйных пастаўшчыкоў тавараў у адрас інтэрнэт-крам. Пры рэалізацыі інтэрнэт-крамам набытых за валюту тавараў работнікі арганізацыі ўстанаўлівалі цэны ў беларускіх рублях, зыходзячы з курсу замежнай валюты ў адносінах да беларускага рубля на 25–30% працэнтаў вышэйшага за рэальны курс. У выніку адпускная цана тавараў безь відочных падстаў неабгрунтавана павялічвалася. Распачата крымінальная справа. Фактычны кіраўнік знаходзіцца пад вартай», — заявілі ў КДК.
Прыватная аптэка
16 кастрычніка АНТ паведаміла пра крымінальную справу ў дачыненьні да адной з прыватных аптэчных сетак.
Падстава — павышэньне цэнаў на некаторыя лекі і харчовыя дадаткі.
Фармацэўтычная кампанія
Суд аштрафаваў фармацэўтычную кампанію «Інтэрфармакс», якая займаецца ў асноўным дыстрыбуцыяй мэдпрэпаратаў, за завышэньне цэнаў па заяве Міністэрства антыманапольнага рэгуляваньня і гандлю.
Парушэньне зафіксавалі станам на 2020 год, яно тычылася толькі аднаго вітаміннага прэпарата. Згодна з матэрыяламі справы, ЗТАА «Інтэрфармакс» з 9 чэрвеня па 15 кастрычніка 2020-га парушыла заканадаўства аб цэнаўтварэньні — не вытрымлівала гранічныя адпускныя цэны на «Аквадэтрым». У выніку фактычная выручка перавысіла разьліковую на 15 908 рублёў 45 капеек.
Крымінальная справа за зьніжкі
14 кастрычніка прэс-служба КДК паведаміла пра крымінальную справу не за рост цэнаў, а за зьніжкі.
КДК Брэсцкай вобласьці разам зь фінансавай міліцыяй палічылі неабгрунтаванымі зьніжкі, якія Бярозаўскі мясакансэрвавы камбінат даваў гандлёвым сеткам.
«Устаноўлена, што камбінатам з 2021 году па кастрычнік 2022 году ў парушэньне заканадаўства аб рэгуляваньні цэнаў на сацыяльна-значныя тавары пры рэалізацыі каўбасных вырабаў (з узроўнем рэнтабэльнасьці меншым за 10%) неабгрунтавана даваліся гандлёвым прадпрыемствам зьніжкі, памер якіх перавышаў 10%», — паведамляе прэс-служба КДК.
