Паводле яго, польскія ўлады дамагаюцца разьмяшчэньня ў сваёй краіне амэрыканскай ядзернай зброі.
Гэтыя заявы Лукашэнкі мы папрасілі пракамэнтаваць польскага экспэрта па праблемах бясьпекі, старшага навуковага супрацоўніка Фонду Пуласкага, былога дырэктара інфармацыйнага бюро NATO ў Маскве (2010–2015) Робэрта Пшчэля.
— Тое, што кажа гэты чалавек, — гэта дэзынфармацыя і правакацыя. Гэта ня мае дачыненьня да рэальнасьці, але мае — да складаных адносін Лукашэнкі з Масквой.
У NATO ёсьць тры краіны, якія маюць ядзерную зброю — гэта ЗША, Вялікая Брытанія і Францыя. Гэтая зброя ёсьць у арсэнале Альянсу. Але ён падыходзіць да гэтага пытаньня вельмі адказна. Ёсьць пэўная палітыка nuclear sharing — разьмяшчэньня ядзернай зброі ў краінах альянсу. Дыскусія аб зьмене гэтага існага разьмяшчэньня яшчэ нават не пачыналася. Так што на сёньняшні дзень проста няма прадмету абмеркаваньня.
І сёньня калі каму і варта задаваць пытаньні, дык гэта Расеі, якая ледзь ня штодзень пагражае ядзернай зброяй. Такіх безадказных паводзін не было нават у Савецкага Саюзу. А што да Беларусі, дык сёлета па прапанове Лукашэнкі з Канстытуцыі быў выдалены артыкул аб бязьядзерным статусе краіны. Так што пытаньні трэба задаваць Лукашэнку і Пуціну, а не кіраўніцтву Польшчы.
