Міліцыя затрымала Ф. за тое, што ён даслаў 160 sms са свайго тэлефона на польскі нумар тэлеканалу «Белсат». Ён пісаў пра перамяшчэньні расейскіх вайскоўцаў па Гомлі і ўзьлёты расейскіх самалётаў з Гомля і ваколіц.
На судзе пэнсіянэр цалкам прызнаў віну і раскаяўся. Ён заявіў, што ня ведаў пра тое, што «Белсат» — экстрэмісцкае фармаваньне. Нумар тэлефона ён убачыў на Youtube па тэлевізары, які падключаецца да інтэрнэту. Пазьней тэлевізар быў забраны як «сродак зьдзяйсьненьня злачынства».
Крыніца, знаёмая з сытуацыяй, паведаміла Свабодзе, што ў Ф. ёсьць псыхічнае захворваньне, яно невылечнае. Дыягназ быў выстаўлены яшчэ ў савецкі час, у 80-я гады. Пасьля пераезду на іншае месца жыхарства Ф. не зьвяртаўся да лекараў.
«Цяпер судзьдзя і пракурор ня ведаюць, што зь ім рабіць. Бо на судзе высьветлілася, што яго яшчэ ў 80-х прызналі неадэкватным, такім, хто не адказвае за свае ўчынкі, доўга лячылі ў псыхіятрычным стацыянары. Цяпер жа экспэртыза прызнала яго адэкватным. І толькі дакумэнты са шпіталя спынілі працэс, бо ўжо меўся быць прысуд», — патлумачыла крыніца.
На судзе дапыталі экспэрта. Яна пацьвердзіла, што захворваньне невылечнае, можа быць толькі рэмісія. Цяпер Ф. накіроўваюць на новую судовую экспэртызу.
«Апроч псыхіятрычнага дыягназу, у яго праблемы зь фізычным здароўем. У яго выразалі грыжу, ён ня можа сядзець, толькі ляжаць ці стаяць, ёсьць іншыя праблемы. А чалавека трымаюць у СІЗА», — дадала крыніца.
Летась у лістападзе ў Гомлі судзілі 35-гадовага Юрыя Прахарэнку. Яго судзілі за камэнтары ў Telegram, якія сьледзтва палічыла «абразамі службовых асобаў».
Пасьля затрыманьня і арышту Прахарэнка атрымаў псыхічны разлад. Ён страціў, па словах таты, 35 кіляграмаў вагі.
Прахарэнку абвінавацілі ў «абразе прэзыдэнта, міліцыянтаў, судзьдзяў, дэпутата». Усяго ў справе 23 пацярпелыя, у тым ліку Лукашэнка.
Сам Юры на судзе не прысутнічаў. Экспэртыза паказала, што на фоне затрыманьня і пабіцьця ў жніўні 2020 году, а таксама крымінальнага перасьледу і зьмяшчэньня ў турму ў яго разьвіўся псыхічны разлад. Яго інтарэсы на судзе прадстаўляў бацька.
Суд пастанавіў адправіць Прахарэнку на псыхіятрычнае лячэньне.
