26-гадовы Ўладзіслаў Белавусаў — адзін з самых вядомых прадстаўнікоў хакею на траве. Ён выступае за зборную Беларусі ў гэтым відзе спорту і за клюб «Менск». Акрамя таго, мае больш за 2 млн падпісантаў у сваім TikTok.
Белавусаў з Воршы, выхаванец мясцовай школы «Тэмп», у яго спартовая сям’я — стрыечны брат таксама гуляе ў хакей на траве, а маці Сьвятлана Белавусава была чэмпіёнкай краіны ў гэтым відзе, а цяпер трэнэрка.
Пасьля залатога мэдаля ў чэмпіянаце Беларусі Белавусаў дапускаў, што можа паспрабаваць сябе ў эўрапейскім чэмпіянаце, але адзначаў, што цяпер зрабіць гэта складаней праз шэраг абмежаваньняў. Не выключаў і пераезд у расейскі клюб. Пры гэтым Уладзіслаў падкрэсьліваў, што не паўсюль за межамі Беларусі будуць больш выгадныя прапановы ў спартовым і фінансавым плянах.
Сілавікі пасьля зьдзекаў са спартоўца здабылі кантроль над ягоным TikTok, дзе апублікавалі сваё відэа з «прызнаньнямі» спартоўца. Паводле інфармацыі «Трыбуны», Белавусава затрымалі практычна адразу пасьля здымак на тэлеканале «Беларусь-5» за нібыта відэа з народных пратэстаў у 2020-м.
Літаральна перад самым затрыманьнем Белавусаў разам з аднаклюбнікамі ўдзельнічаў у перадачы на дзяржаўнай тэлевізіі.
24 лютага, калі пачаўся поўнамаштабны наступ Расеі на Ўкраіну, Белавусаў знаходзіўся на захадзе Ўкраіны, адкуль зь цяжкасьцямі выехаў.
У якой справе праходзіць хакеіст — адміністрацыйнай ці крымінальнай — дакладнай інфармацыі пакуль няма.
