На пасяджэньні Генасамблеі ААН Зяленскі назваў пяць перадумоў міру

Паводле яго, гэтая формула зьмяшчае наступныя пункты:

• пакараньне за агрэсію;
• абарона жыцьця;
• аднаўленьне бясьпекі і тэрытарыяльнай цэласнасьці;
• гарантыі бясьпекі;
• рашучасьць абараняцца.

«Гэта ўжо добра вядомая Расеі формула злачынства і пакараньня. І гэта формула справядлівасьці і правапарадку, якой Расеі яшчэ трэба будзе засвоіць. Як і любы іншы патэнцыйны агрэсар. Чаго няма ў нашай формуле? Нэўтралітэт», — сказаў кіраўнік украінскай дзяржавы.

Паводле яго, тыя, хто гавораць пра нэўтралітэт, «калі пад ударам чалавечыя каштоўнасьці і мір», маюць на ўвазе зусім іншае: гавораць пра абыякавасьць.

«Кожны сам за сябе. Вось што кажуць. Іх умоўна цікавяць праблемы адзін аднаго. Яны клапоцяцца адзін пра аднаго фармальна. Пратакольна спачуваюць. І таму робяць выгляд, што некага абараняюць, а насамрэч толькі свае вузкія інтарэсы, гэтак жа ўмоўна, фармальна і пратакольна. Гэта тое, што стварае ўмовы для вайны. Гэта тое, што трэба выправіць, каб стварыць умовы для міру. Патрэбна толькі рашучасьць», — сказаў Зяленскі.

Паводле украінскага прэзыдэнта, Расея баіцца рэальных перамоваў і ня хоча выконваць ніякіх справядлівых міжнародных абавязаньняў.

«Ён хлусіць усім, як гэта ўласьціва агрэсарам. Для тэрарыстаў. Нават цяпер, калі Расея кажа пра перамовы, яна хоча толькі затармазіць сваё адступленьне. Расея хоча перазімаваць на захопленай тэрыторыі Ўкраіны і падрыхтаваць сілы да новай спробы наступу. На новыя Бучы, на новыя Ізюмы... Ці хаця б на ўмацаваньні на захопленых землях і вайсковую мабілізацыю дома», — сказаў прэзыдэнт.

Па словах Зяленскага, Украіна ня можа пагадзіцца на адкладзеную вайну, «бо яна будзе яшчэ больш гарачай, чым цяпер».

Ён падкрэсьліў, што Расею трэба нарэшце прызнаць дзяржавай – спонсарам тэрарызму. «На ўсіх узроўнях. Ва ўсіх краінах, якія вызнаюць каштоўнасьці міру і абароны жыцьця чалавека. Юрыдычна. Палітычна», — сказаў прэзыдэнт Украіны.

«Украіна хоча міру. Эўропа хоча міру. Сьвет хоча міру. І мы бачылі, хто адзіны хоча вайны. Але Расея ня зможа спыніць ход гісторыі. Гуманнасьць і міжнароднае права мацнейшыя за адну тэрарыстычную дзяржаву. Расеі давядзецца скончыць гэтую вайну. Вайна, якую яна пачала. І я выключаю, што ўрэгуляваньне можа адбыцца на іншай аснове, акрамя ўкраінскай формулы міру», — падкрэсьліў Уладзімір Зяленскі.

Выступ Зяленскага стаў адным з самых чаканых падчас чарговай сэсіі Генасамблеі ААН, якая сёлета прысьвечана вайне Расеі супраць Украіны. На леташняй Генасамблеі ў верасьні мінулага году Зяленскі параўнаў ААН з «супэргероем у адстаўцы», калі заклікаў спыніць агрэсію Расеі супраць Украіны.