Ён адзначыў, што цяпер ратавальнікі тушаць пажар у Харкаве, у які ўпалі дзьве ракеты.
«Энэргетыкі працуюць над аднаўленьнем работы сыстэм крытычнай інфраструктуры, каб электрычнасьць зьявілася ў шпіталях і іншых жыцьцёва важных аб’ектах як мага хутчэй. Грамады, якія зараз засталіся без электрычнасьці, будуць адноўлены бліжэйшым часам. Пакуль без электрычнасьці застаюцца шэраг рэгіёнаў: Харкаўская, Сумская, Палтаўская, Днепрапятроўская, часткова Данецкая», — сказаў ён.
Цімашэнка папярэдзіў, што адключэньні электрычнасьці магчымыя па ўсёй краіне.
Пазьней ён заявіў аб аднаўленьні энэргазабесьпячэньня ў Сумскай і Днепрапятроўскай абласьцях.
Дарадца кіраўніка Адміністрацыі прэзыдэнта Міхаіл Падаляк паведаміў, што абстрэл быў накіраваны, у прыватнасьці, на Харкаўскую цеплаэлектрастанцыю-5.
«Гэта безумоўная праява тэрарызму Расеі і яе жаданьня масава пакінуць мірных грамадзян без сьвятла і цяпла. Такі баязьлівы „адказ“ на ўцёкі ўласнага войска з поля бою», — пракамэнтаваў Падаляк.
Раней кіраўнікі мясцовага самакіравання паведамлялі аб адключэннях электраэнергіі ў шэрагу рэгіёнаў Украіны ў выніку абстрэлаў з боку Расеі.
Зяленскі ў сваім тэлеграм-канале апублікаваў відэа наступстваў аднаго з сёньняшніх вячэрніх прылётаў па энэргетычнай інфраструктуры ўсходу краіны і суправадзіў яго эмацыйным зваротам да расейцаў: «Холад, голад, цемра і смага для нас не такія страшныя і сьмяротныя, як вашыя „дружба і братэрства“».
