Кіраўнік запуску спыніў сёньняшнюю спробу запуску карабля Artemis I. Ракета і касьмічны карабель Orion застаюцца ў бясьпечнай і стабільнай канфігурацыі. Пускавыя дыспэтчары ацэньваюць, чаму не ўдалося давесьці рухавікі да тэмпэратурнага дыяпазону, які патрэбны для ўзьлёту.
Рэзэрвовымі датамі запуску названыя 2 і 5 верасьня.
Нацыянальная ўправа аэранаўтыкі і дасьледаваньня касьмічнай прасторы ЗША плянуе запусьціць звышцяжкую ракету-носьбіт SLS даўжынёй 98 мэтраў, прызначаную для палёту да Месяца.
Пуск ракеты-носьбіта ў пары з касьмічным караблём Orion першапачаткова быў заплянаваны на 29 жніўня з касмадрому на мысе Канавэрэл у Флорыдзе.
Мэта палёту — правесьці для SLS, якая лічыцца самай магутнай ракетай у сьвеце, стрэс-тэст падчас рэальнай працы, перш чым яе прызнаюць гатовай да перавозкі астранаўтаў. Запушчаны ёю карабель павінен будзе правесьці шэсьць тыдняў на арбіце Месяца, пасьля чаго вярнуцца на Зямлю.
У выпадку посьпеху місіі астранаўты адправяцца на арбіту Месяца ўжо ў другім палёце ў 2024 годзе. Яшчэ праз год плянуецца адправіць місію з высадкай на Месяц.
- Апошні раз чалавека адправілі да Месяца ў 1972 годзе, на караблі «Апалён-17».
- Амэрыканскую праграму вяртаньня чалавека на Месяц згарнулі пры прэзыдэнце Бараку Абаму. Перазапусьцілі яе распараджэньнем прэзыдэнта Дональда Трампа ў 2019 годзе. У 2021 годзе прэзыдэнт Джо Байдэн заклікаў Кангрэс павялічыць фінансаваньне NASA. Праграма ўжо абышлася амэрыканскаму бюджэту сама меней у 37 мільярдаў даляраў.
