Лінкі ўнівэрсальнага доступу

«Прадала бацьку, сям’ю, радзіму». Расейскі сэнатар назваў сваю дачку «здраднікам» і адрокся ад яе празь яе антываенную пазыцыю


Эдўард Ісакаў
Эдўард Ісакаў

Член Савета Фэдэрацы РФ Эдуард Ісакаў назваў сваю дачку Дыяну «здраднікам».

У тэлеграм-канале сэнатар ад Ханты-Мансійскай акругі (Югры) напісаў, што ягоная дачка «прадала свайго бацьку, сям’ю, Радзіму». Падставай для запісу сталі апублікаваныя ў пятніцу інтэрвію Дзіяны Ісакавай расейскай службе ВВС і выданьню «Медуза». У іх дачка сэнатара паведаміла, што выступае супраць вайны ва Ўкраіне і нядаўна пакінула Расею.

«Цяжка падабраць словы, калі твая дачка аказваецца здраднікам» — напісаў Ісакаў. Паводле яго слоў, даведаўшыся, што ў красавіку ягоная дачка прыняла ўдзелы ў акцыі супраць вайны (сэнатар называе яе «СВА» — спэцыяльная ваенная апэрацыя — як афіцыйна ў Расеі называецца ўварваньне ва Украіну), ён «спрабаваў растлумачыць ёй неабходнасьць правядзеньня СВА, прапаноўваў наведаць месцы баявой славы савецкага народа», але гэтыя намаганьні былі марнымі.

Ісакаў таксама падкрэсьліў, што Дыяна — яго дачка ад першага шлюбу, якую ён «не выхоўвае з трох гадоў». Ён таксама выступіў са сьцьвярджэньнямі, што яна знаходзіцца на ўліку ў псіханеўралягічным дыспансэры, называла сябе прадстаўніцай ЛГБТ, і зь ёй «складана мець зносіны».

«З таго моманту, як я даведаўся, што ў яе антырасейская пазыцыя, мы ня маем зносіны, я яе не забясьпечваю, не прадастаўляю жытло» — напісаў Ісакаў.

Раней у інтэрвію ВВС ягоная дачка расказала, што ў яе былі канфлікты з бацькам і некалькі спробаў суіцыду, якія яна назвала «наступствамі жорсткага выхаваньня», і пра тое, што бацька, нягледзячы на ягоныя сьцьвярджэньні, што ён яе «не выхоўваў», аказваў на яе жыцьцё вялікі ўплыў.

Ісакаў знаходзіцца ў санкцыйных сьпісах Вялікабрытаніі, ЭЗ і Канады. Ён актыўна выступае ў падтрымку вайны.

  • 25-гадовая Дыяна Ісакава напярэдадні ва інстаграме напісала, што пакідае Расею і гатова расказаць пра сваё стаўленьне да вайны. У пятніцу выйшлі яе інтэрвію. У іх яна расказала, што ўжо некалькі гадоў прытрымліваецца апазыцыйных поглядаў і неаднойчы канфліктавала з бацькам, у тым ліку з-за стаўленьня да правоў ЛГБТ. У сакавіку яна выйшла ў Сочы на малалікі мітынг супраць вайны, а ў красавіку правяла ўласную антываенную акцыю і была затрымана. Бацька, як вынікае з інтэрвію, даведаўся пра яе затрыманьне ад Валянціны Мацьвіенкі — кіраўніка Савета Фэдэрацыі РФ. Сам сэнатар сказаў ВВС, што Мацьвіенка прасіла яго «пагаварыць з дачкой, растлумачыць ёй прычыны і неабходнасьць спэцапэрацыі». Размова завяршылася тым, што Ісакаў, па словах яго дачкі, абвясьціў ёй, што яна яму больш не дачка.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG