Лінкі ўнівэрсальнага доступу

Каля Джанкою працягваюцца выбухі боепрыпасаў. Акупацыйныя ўлады Крыму залучаюць авіяцыю для тушэньня пажару


Выбух у Джанкойскім раёне, 16 жніўня 2022
Выбух у Джанкойскім раёне, 16 жніўня 2022

Кіраўнік расейскай акупацыйнай улады Крыму Сяргей Аксёнаў заявіў аб неабходнасьці залучыць авіяцыю Міністэрства надзвычайных сытуацый і Расгвардыі для тушэньня пажару на складзе боепрыпасаў каля сяла Майскага ў Джанкойскім раёне.

Паводле яго, як паведамляе агенцтва «Крыминфо», апошняя дэтанацыя была раніцай на пачатку дзявятай гадзіны.

«Мы дамовіліся, цяпер будуць выдзеленыя два пажарныя верталёты. З дрона глядзелі, што там адбываецца: тлеюць два невялікія ачагі, ёсьць рызыкі ўзгараньня і дэтанацыі, але ў любым выпадку да 14:00 (трэба) падняць у паветра ўсю тэхніку і завершыць тушэньне пажуру», — сказаў Аксёнаў.

16 жніўня выбухі пашкодзілі ЛЭП, электрастанцыю, чыгунку, а таксама шэраг жылых дамоў. Паведамлялі аб двух пацярпелых жыхарах. З навакольных населеных пунктаў эвакуавалі каля 5 тысяч грамадзян. Міністэрства абароны Расеі спачатку заявіла, што на складзе здэтанавалі боепрыпасы, а празь нейкі час галоўнай прычынай здарэньня назвала «дывэрсію».

Прэзыдэнт Украіны Ўладзімір Зяленскі ў сваім традыцыйным вячэрнім відэазвароце заклікаў грамадзян, якія знаходзяцца на акупаваных Расеяй украінскіх тэрыторыях, трымацца далей ад вайсковых аб’ектаў.

«Прашу зараз усіх нашых людзей у Крыме, у іншых рэгіёнах на поўдні Ўкраіны, у акупаваных раёнах Данбасу і Харкаўшчыны быць вельмі ўважлівымі. Калі ласка, не набліжайцеся да вайсковых аб’ектаў расейскай арміі і ўсіх тых месцаў, дзе яны захоўваюць боепрыпасы і тэхніку, дзе трымаюць свае штабы», — заявіў Уладзімір Зяленскі.

Дарадца кіраўніка Офісу прэзыдэнта Ўкраіны Міхайла Падаляк у інтэрвію брытанскаму выданьню The Guardian намякнуў, што Крымскі мост, які злучае мацерыковую Расею з акупаваным Крымам, зьяўляецца законнай вайсковай цэльлю для Ўкраіны.

«Гэта незаконнае будаўніцтва і асноўная брама для забесьпячэньня расейскай арміі ў Крыме. Такія аб’екты мусяць быць зьнішчаныя», — сказаў Падаляк.

Адразу пасьля таго, як стала вядома аб выбухах на аэрадроме «Сакі», а потым каля Джанкою і Сімферопалю, вялікая колькасьць жыхароў Крыму накіравалася ў Расею па Крымскім мосьце. Як паведамляюць крымскія СМІ, гэтымі днямі зафіксаваны рэкорд сутачнага руху — за 24 гадзіны ў абодва бакі праехала 38 297 аўтамабіляў. Мінулы рэкорд быў 16 жніўня 2020 году, калі па мосьце праехалі 37 374 транспартныя сродкі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG