Лінкі ўнівэрсальнага доступу

«Схуднеў, ходзіць дрэнна, бо падагра адолела». Жонка палітвязьня Аляксандра Фядуты расказала пра першы дзень суду


Аляксандар Фядута, архіўнае фота
Аляксандар Фядута, архіўнае фота

Жонка беларускага паліттэхноляга Аляксандра Фядуты Марына Шыбко падзялілася ў Фэйсбуку ўражаньнямі ад першага дня суду над мужам па справе «аб змове з мэтай захопу дзяржаўнай улады».

Справу разглядае судзьдзя Менскага абласнога суду Ўладзімер Арэшка, фігуранты справы — Юры Зянковіч, Аляксандар Фядута, Рыгор Кастусёў, Вольга Галубовіч і Дзяніс Краўчук, суд праходзіць у адкрытым рэжыме.

Як распавяла ў Фэйсбуку жонка Фядуты, у 11.00 29 ліпеня ўсім сваякам і іншым асобам забаранілі ўваход у будынак, запрасілі толькі дзяржаўную прэсу і тэлебачаньне, «было шмат ахоўнікаў будынку суда».

«Калі запэўнілі, што суд закрыты, і пра гэта было абвешчана загадзя, людзі пачалі разьяжджацца (народу было мала), а сваякі некаторых увогуле не прыехалі (суд жа закрыты), тут нечаканасьць здарылася, суд абвясьцілі адкрытым… ну, людзі зьехалі. У выніку нікога ў залі, акрамя прэсы...», — расказвае жонка Марына Шыбко пра першы дзень суду.

Таксама яна распавяла, як пасьля доўгага часу ўбачыла мужа.

«Я ўбачыла АІФа (так блізкія называюць Аляксандра Іосіфавіча Фядуту – рэд.).... схуднеў, дрэнна ходзіць, бо падагра адолела, дазволілі перадаць палку для хады ў СІЗА, пры ўсьмешцы ў АІФа не назіраецца зубоў 5-6 (Юры Дзетачкін з кіно) і пастрыжаны адпаведна, кораценька, кругі пад вачыма. Да уж, турма не ўпрыгожвае», — распавяла яна.

Паводле Марыны Шыбко, падчас судовага паседжаньня 29 ліпеня зачыталі абвінавачаньні Зянковічу і Фядуце, у панядзелак 1 жніўня будуць зачытваць абвінавачаньні астатнім фігурантам справы.

«Нельга было махаць, падыходзіць і размаўляць з абвінавачанымі. Я адправіла паветраныя пацалункі, усім памахала і павітала нашых. На заўвагу мне я адказала, што больш сваволіць ня буду і паводзіла сябе добра. Мы моўчкі размаўлялі з Сашай, я чытала яму свае вершы і казала, што люблю, люблю, люблю. Ён адказваў узаемнасьцю і прасіў у мяне прабачэньня. Думаю, што мы зразумелі адзін аднаго», — напісала Марына Шыбко.

Абвінавачаных па справе справы «аб змове з мэтай захопу дзяржаўнай улады» затрымалі ў сярэдзіне красавіка 2021 года. Лукашэнка тады заявіў, што яны нібыта рыхтавалі замах на яго і ягоных сыноў. Справу расьсьледаваў Камітэт дзяржаўнай бясьпекі Беларусі.

Зянковіч абвінавачваецца паводле ч. 1 арт. 357 КК (змова з мэтай захопу дзяржаўнай улады неканстытуцыйным шляхам), ч. 1 арт. 361-1 КК (стварэньне экстрэмісцкага фармаваньня і кіраўніцтва ім), ч. 3 арт. 361 КК (публічныя заклікі да захопу дзяржаўнай улады), ч. 3 арт. 130 КК (распальваньне сацыяльнай варожасьці).

Фядута і Кастусёў — паводле ч. 1 арт. 357 КК (змова з мэтай захопу дзяржаўнай улады неканстытуцыйным шляхам).

Галубовіч і Краўчук — паводле ч. 1 арт. 342 КК (актыўны ўдзел у групавых дзеяньнях, якія груба парушаюць грамадзкі парадак).

Праваабаронцы прызналі палітвязьнямі ўсіх, акрамя Зянковіча.

Затрыманьне Зянковіча, Кастусёва, Фядуты і справа «змоўшчыкаў». Што трэба ведаць

  • У Шклове ўвечары 12 красавіка затрымалі кіраўніка Партыі БНФ Рыгора Кастусёва. Тады было вядома толькі, што ён праходзіць у крымінальнай справе і знаходзіцца ў СІЗА КДБ.
  • Увечары таго ж дня жонка беларускага паліттэхноляга Аляксандра Фядуты паведаміла пра яго зьнікненьне ў Маскве. 13 красавіка КДБ Беларусі паведаміў, што Фядуту затрымалі.
  • У ноч на 14 красавіка стала вядома аб затрыманьні ў Маскве беларускага адваката з ЗША Юрася Зянковіча. Усе яны цяпер у менскім СІЗА КДБ.
Юрась Зянковіч, Аляксандар Фядута, Рыгор Кастусёў (зьлева направа)
Юрась Зянковіч, Аляксандар Фядута, Рыгор Кастусёў (зьлева направа)
  • Увечары 17 красавіка дзяржаўныя СМІ Беларусі паказалі заяву Аляксандра Лукашэнкі, што заходнія спэцслужбы рыхтавалі збройны мяцеж, а таксама замах на яго і на ягоных дзяцей.
  • Лукашэнка абвінаваціў у датычнасьці да падрыхтоўкі замаху затрыманых Зянковіча, Кастусёва і Фядуту.
  • Амаль сынхронна ФСБ Расеі заявіла, што яны сумесна з КДБ Беларусі спынілі меркаваную змову з удзелам Зянковіча і Фядуты, якія нібыта плянавалі 9 траўня «ажыцьцяўленьне вайсковага перавароту ў Беларусі па адпрацаваным сцэнары „каляровых рэвалюцый“ з прыцягненьнем мясцовых і ўкраінскіх нацыяналістаў, а таксама фізычную ліквідацыю Аляксандра Лукашэнкі».
  • У рэпартажы на беларускім дзяржаўным тэлеканале АНТ паказалі фрагмэнт відэаразмовы ў Zoom, у якой, акрамя Зянковіча, Кастусёва і Фядуты, удзельнічалі яшчэ чатыры чалавекі (усе жывуць у ЗША), нібыта ўдзельнікі змовы. У інтэрвію Свабодзе двое зь іх адкінулі абвінавачаньні (тут і тут).
  • Афіцыйныя прадстаўнікі ЗША і Польшчы назвалі абвінавачаньні ўладаў Беларусі і Расеі на свой бок няпраўдай.
  • 21 красавіка Ўладзімір Пуцін заявіў, што краіны Захаду ігнаруюць факты падрыхтоўкі «дзяржаўнага перавароту ў Беларусі» і «плянаваньня забойства» Аляксандра Лукашэнкі. Ён абвінаваціў удзельнікаў «змовы супраць Лукашэнкі» ў падрыхтоўцы масаванай кібэратакі на Беларусь.
  • 22 красавіка стала вядома, што старшыня Партыі БНФ Рыгор Кастусёў, палітоляг Аляксандар Фядута і юрыст Юры Зянковіч абвінавачаныя ў змове з мэтай захопу дзяржаўнай улады неканстытуцыйным шляхам (ч. 1 арт. 357 Крымінальнага кодэксу).
  • 30 красавіка КДБ назваў імёны дзевяці абвінавачаных. Гэта Аляксандар Фядута, Юры Зянковіч, Рыгор Кастусёў, Вольга Галубовіч, Дзьмітры Шчыгельскі, Аляксандар Перапечка, Павал Кулажанка, Віталь Макаранка, Ігар Макар. Акрамя Фядуты, Зянковіча і Кастусёва, у няволі трымаюць Вольгу Галубовіч.
  • Прысуды ў справе: Юрасю Зянковічу — 11 гадоў калёніі, Аляксандру Фядуту — 10 гадоў, Рыгору Кастусёву — 10 гадоў, Дзянісу Краўчуку — 2,5 года.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG