Следчы камітэт Беларусі перадаў крымінальную справу рэдактара «Ежедневника» Сяргея Сацука ў пракуратуру. Пра гэта паведамляе БАЖ. Адтуль справа будзе накіраваная ў суд.
Сяргей Сацук знаходзіцца за кратамі з 8 сьнежня мінулага году. Яго ўтрымліваюць у СІЗА-1 на вуліцы Валадарскага ў Менску.
Рэдактара «Ежедневника» затрымалі 8 сьнежня 2021 году. У той дзень дома ў журналіста прайшоў чарговы ператрус, а самога Сяргея зьмясьцілі ў СІЗА. Тэрмін утрыманьня пад вартай у гэтай справе мусіў скончыцца ў траўні.
У чэрвені на сувязь з БАЖ выйшаў былы сукамэрнік зьняволенага журналіста Сацука. Паводле яго, за некалькі дзён да канца тэрміну Сяргею выставілі абвінавачаньні па новых артыкулах КК:
- 130-м, ч. 2 (распальваньне варожасьці з выкарыстаньнем службовых паўнамоцтваў);
- 426-м, ч. 2 (перавышэньне службовых паўнамоцтваў з карысьлівых ці іншых памкненьняў).
Якіх канкрэтна дзеяньняў рэдактара тычацца абвінавачаньні, невядома.
Сацук раней скардзіўся на стан здароўя. У лютым ягоныя сябры і родныя зьвярталіся ў Сьледчы камітэт, каб журналіста выпусьцілі пад іх асабістае паручальніцтва, але ім адмовілі.
Праваабаронцы прызналі Сяргея Сацука палітычным вязьнем. На сёньня ў няволі ў Беларусі знаходзяцца 29 прадстаўнікоў мэдыя.
