З 5 ліпеня «Абсалютбанк» афіцыйна апавясьціў кліентаў аб тым, што зьмяніў назву і, уласна, перастаў быць банкам. Цяпер гэта нябанкаўская крэдытна-фінансавая арганізацыя «ОптыКурс». Рашэньне ўзгодненае з Нацбанкам Беларусі.
З-за зьмены юрыдычнага статусу ў кампаніі адклікалі ліцэнзію на ажыцьцяўленьне дзейнасьці па такіх банкаўскіх апэрацыях, як:
- прыцягненьне грашовых сродкаў фізычных асоб на рахункі і (або) ва ўклады (дэпазыты);
- разьмяшчэньне прыцягнутых грашовых сродкаў фізычных і юрыдычных асоб на рахункі і ва ўклады (дэпазыты) ад свайго імя і за свой кошт на ўмовах зваротнасьці, платнасьці і тэрміновасьці;
- адкрыцьцё і вядзеньне банкаўскіх рахункаў фізычных асоб;
- выпуск у абарачэньне (эмісія) банкаўскіх плацежных картак;
- выдача каштоўных папер, якія пацьвярджаюць прыцягненьне грашовых сродкаў ва ўклады (дэпазыты) і разьмяшчэньне іх на рахункі.
У Нацбанку ўдакладняюць, што на 5 ліпеня ў кампаніі не было разьмешчаных укладаў насельніцтва ці індывідуальных прадпрымальнікаў
«Абсалютбанк», які належаў набліжанаму да Лукашэнкі бізнэсоўцу Мікалаю Вераб'ю, у 2021 годзе трапіў пад санкцыі ЗША.
