Брытанскія ўлады таксама забароняць імпарт беларускага жалеза і сталі, будзе абмежаваны доступ Беларусі да фінансавага сэктара — выпуску даўгавых абавязацельстваў і каштоўных папер у Лёндане. Агулам забароны закрануць імпарт і экспарт тавараў на суму каля 60 мільёнаў фунтаў стэрлінгаў.
«Беларускі рэжым актыўна садзейнічаў уварваньню Пуціна, дазволіўшы Расеі выкарыстоўваць сваю тэрыторыю для нападу на Ўкраіну — для запуску войскаў і ракет са сваёй тэрыторыі і пропуску расейскіх самалётаў праз паветраную прастору. Лукашэнка таксама адкрыта падтрымліваў наратыў Крамля, сьцьвярджаючы, што Кіеў „правакуе Расею“, каб апраўдаць крывавае ўварваньне Пуціна», — гаворыцца на сайце ўрада Вялікай Брытаніі.
Афіцыйна беларускае войска не прымае ўдзелу ў вайне Расеі з Украінай. Але Беларусь падтрымлівае ў гэтым канфлікце Крэмль: Лукашэнка даў тэрыторыю Беларусі для праезду і часовай дысьлякацыі расейскіх войскаў, а з тэрыторыі Беларусі наносіліся ўдары па Ўкраіне.
Праз спрыяньне ў вайне супраць Украіны і масавых рэпрэсій ЗША, ЭЗ і Вялікая Брытанія ўвялі санкцыі супраць Беларусі. Паводле слоў першага віцэ-прэм’ера краіны Мікалая Снапкова, яны «закранулі каля 20% беларускай эканомікі і прывялі да зьніжэньня ВУП Беларусі ў студзені — красавіку на 2,1%»: у сувязі зь імі толькі сёлета эканоміка Беларусі рызыкуе недаатрымаць $14 млрд экспартнай выручкі.
