Трэцяя падобная акцыя перад парлямэнтам Грузіі з патрабаваньнем адстаўкі прэм’ер-міністра і фармаваньня ўраду нацыянальнай згоды, які будзе выконваць 12 умоваў Эўракамісіі, каб Грузія стала кандыдатам у ЭЗ.
Арганізатары заявілі, што ноччу ніхто ня будзе разыходзіцца. Чакаецца, што будзе перакрыты цэнтральны праспэкт Руставэлі.
Дзьве папярэднія акцыі зьбіралі дзясяткі тысяч чалавек, у асноўным моладзь. У гэтую нядзелю чакаецца вялікая колькасьць удзельнікаў з рэгіёнаў. Ва ўсіх буйных гарадах Грузіі для тых, хто едзе на акцыю, арганізаваны бясплатныя аўтобусныя рэйсы.
Арганізатары акцыі заявілі аб нападах на агітатараў мітынгу ў Тбілісі і рэгіёнах з боку актывістаў кіроўнай партыі. Апазыцыя запатрабавала ад МУС забясьпечыць права на свабоду сходаў. Улады працягваюць заяўляць, што за грамадзянскімі рухамі, арганізатарамі акцый, галоўнай мэтай якіх зьяўляецца дэстабілізацыя і вяртаньне да ўлады, стаіць апазыцыйны «Нацыянальны рух».
Апазыцыянэры заяўляюць, што не зьяўляюцца арганізатарамі, але падтрымліваюць акцыю, якая выказвае меркаваньне пра грамадзкаактыўную частку грамадзтва. Партыі прыходзяць на акцыі «Дадому, у Эўропу» без партыйнай сымболікі.
23 чэрвеня Эўрапейская рада прыняла рашэньне аб наданьні Ўкраіне статусу кандыдата на ўступленьне ў Эўразьвяз Такое ж рашэньне лідары ЭЗ прынялі ў дачыненьні да Малдовы. Эўрапейская пэрспэктыва Грузіі была прызнаная, але статус кандыдата не нададзены, бо Тбілісі яшчэ павінен выканаць пэўныя ўмовы.