Лінкі ўнівэрсальнага доступу

У Горадні адкрыўся Форум рэгіёнаў Беларусі і Расеі


Афіша Форуму рэгіёнаў у цэнтры Горадні
Афіша Форуму рэгіёнаў у цэнтры Горадні

Форум праходзіць з 30 чэрвеня па 1 ліпеня. Яго ладзяць дзявяты раз.

У Горадні пачаўся IX Форум рэгіёнаў Беларусі і Расеі. Арганізатары чакаюць, што ўдзельнікі форуму падпішуць пагадненьні на суму больш як $1 млрд. Кантрактная работа вядзецца ў рамках рэалізацыі 28 дарожных мапаў. Арганізацыі і прадпрыемствы дзьвюх краін будуць абмяркоўваць мадэрнізацыю прамысловасьці, імпартазамяшчэньне, працу ва ўмовах заходніх санкцый і іншыя пытаньні.

Раней абвяшчалася, што кіраўнік Расеі Ўладзімір Пуцін упершыню за тры гады прыедзе ў Беларусь. Аднак пазьней Аляксандар Лукашэнка паведаміў, што ягоная сустрэча з Пуціным адбудзецца толькі ў фармаце відэаканфэрэнцыі.

30 чэрвеня адбудзецца пасяджэньне Міжпарлямэнцкай камісіі Савету Рэспублікі Нацыянальнага сходу Рэспублікі Беларусь і Савету Фэдэрацыі Фэдэральнага сходу Расеі па міжрэгіянальным супрацоўніцтве. Беларускі Савет Рэспублікі і расейскі Савет Фэдэрацыі зьяўляюцца арганізатарамі форуму.

У час Форуму адбываецца спэцыялізаваная выстава, дзе дэманструюць тэхніку і іншую прадукцыю дзьвюх дзяржаў. Напярэдадні Форуму Свабода паглядзела, як ідзе падрыхтоўка да мерапрыемства.

У Беларусь 29 чэрвеня прыбыў міністар замежных спраў Расеі Сяргей Лаўроў, але ў ягонай праграме прыезд у Горадню не прапісаны, хаця таксама, як і Форум, прымеркаваны да 30-годзьдзя ўсталяваньня дыпляматычных зносін паміж Беларусьсю і Расеяй. Лаўроў сустрэнецца з Лукашэнкам і міністрам замежных спраў Уладзімерам Макеем, прыме ўдзел у гашэньні канвэртаў, выпушчаных да юбілею.

Акрамя таго, Лаўроў у Менску выступіць перад выкладчыкамі і студэнтамі БДУ.

Прадстаўнікі беларускіх і расейскіх вну будуць удзельнічаць і ў Форуме рэгіёнаў, як сказала першая намесьніца міністра адукацыі Беларусі Ірына Старавойтава падпішуць каля 40 пагадненьняў аб супрацоўніцтве.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG