12 чэрвеня пачаўся першы тур парлямэнцкіх выбараў, падчас якіх французы абіраюць 577 дэпутатаў Нацыянальнага сходу, ніжняй палаты парлямэнту. Парлямэнцкія выбары ў Францыі праходзяць у два туры, другі тур адбудзецца ў наступную нядзелю, 19 чэрвеня, піша AFP.
Падчас папярэдніх выбараў у 2017 годзе партыя Эманюэля Макрона «Наперад, Рэспубліка!» (La Republique en Marche!), перайменаваны ў «Рэнэсанс» у траўні, атрымаў абсалютную большасьць у 308 месцаў у Нацыянальным сходзе. Макрон і яго саюзьнікі цяпер маюць абсалютную парлямэнцкую большасьць у 345 месцаў.
Галоўным канкурэнтам палітычнай сілы Макрона лічыцца саюз левых — Новы народны экалягічна-сацыяльны саюз NUPES (Nouvelle Union Populaire écologique et sociale) Жана-Люка Мэляншона. Новаўтвораны саюз аб’яднаў найбуйнейшыя левыя партыі La France insoumise, Europe Ecologie Les Verts, Камуністычную партыю Францыі і Сацыялістычную партыю. Чакаецца, што NUPES атрымае на гэтых выбарах да 190 месцаў.
Нядаўняе апытаньне, праведзенае дасьледчым і кансультацыйным цэнтрам Elabe, паказала, што прэзыдэнцкая партыя «Рэнэсанс» і яе саюзьнікі — Дэмакратычны саюз Modem, «Horizons» (фр. гарызонты) і «Агір» (фр. дзейнічаць) могуць перамагчы канкурэнтаў, атрымаўшы 280-320 месцаў у парлямэнце.
Але ў кожным выпадку, гэтыя прагнозы паказваюць, што Макрон і хаўрусьнікі нават пры захаваньні большасьці ў парлямэнце наўрад ці здолеюць захаваць такую колькасьць мандатаў.
