Лінкі ўнівэрсальнага доступу

Хроніка перасьледу 25 траўня: Затрымалі старшыню суполкі незалежнага прафсаюзу ў Салігорску, адваката асудзілі за «непадпарадкаваньне»


Аляксандар Мішук, старшыня суполкі Беларускага незалежнага прафсаюзу «Беларуськалію»
Аляксандар Мішук, старшыня суполкі Беларускага незалежнага прафсаюзу «Беларуськалію»

Адваката Брагінца асудзілі на 15 сутак за «непадпарадкаваньне»

Адваката Віталя Брагінца асудзілі на 15 сутак за нібыта непадпарадкаваньне каля РУУС (артыкул 24.3 КаАП) Як паведамляе «Наша Ніва», такі прысуд у судзе Партызанскага раёну Менску вынесла судзьдзя Натальля Дзядкова. Брагінца затрымалі супрацоўнікі КДБ зранку 23 траўня на выхадзе з дому. Пазьней яго даставілі ў Партызанскае РУУС «для праверкі на датычнасьць да пратэставай дзейнасьці». Адтуль ён, як сьцьвярджалася ў судзе, «паспрабаваў сысьці», і ў гэтым і было непадпарадкаваньне.

У Расеі затрымалі беларуса, абвешчанага ў вышук за абразу Лукашэнкі

У Беларусі на затрыманага расейскімі сілавікамі мужчыну раней завялі крымінальную справу і абвясьцілі яго ў фэдэральны вышук, паведамляе выданьне «Мегаполіс».

Паводле выданьня, паліцыю ў Піцеры папярэдзілі аб «падазроным чалавеку» на вуліцы. Нарад патрульных падышоў да незнаёмца і даведаўся ад яго, што ён працуе сантэхнікам у кампаніі, якая займаецца газыфікацыяй. Высьветлілася, што ён знаходзіўся ў фэдэральным вышуку.

У Беларусі на яго завялі крымінальную справу за абразу Лукашэнкі. У выніку яго арыштавалі.

Працягваюцца рэпрэсіі супраць актывістаў незалежнага прафсаюзнага руху Беларусі

Па інфармацыі Радыё Свабода, у галоўны офіс Беларускага незалежнага прафсаюзу ў Салігорску па вуліцы Багамолава, 13а прыйшлі сілавікі. Падразьдзяленьне, якое яны прадстаўляюць, пакуль невядомае. Адбыўся ператрус.

Таксама сілавікі, праўдападобна з КДБ, прыйшлі ў офіс старшыні БНП на «Беларуськаліі» Аляксандра Мішука. Паводле крыніцы, зь імі разам у офісе панятыя, нікога іншага туды не пускаюць.

Сілавікі вывезьлі старшыню Беларускага незалежнага прафсаюзу працаўнікоў ААТ «Беларуськалій» Аляксандра Мішука пасьля ператрусу ў ягонай кватэры, працавалі супрацоўнікі КДБ зь Менску, паведаміла прэс-служба СПБ.

Прадстаўнікі БНП на «Беларуськаліі» па-ранейшаму маюць доступ на працоўныя месцы на фабрыках, рудаўпраўленьнях, дапаможных цэхах.

З Наваполацку Свабодзе паведамілі, што 25 траўня высяляюць з арэнднага офісу суполку БНП работнікаў ААТ «Нафтан».

18 і 19 красавіка па Беларусі пракацілася хваля ператрусаў і затрыманьняў актывістаў незалежнага прафсаюзнага руху. Шэраг лідэраў і ўдзельнікаў прафсаюзаў з таго часу знаходзяцца за кратамі, іх прызналі палітвязьнямі. Частку адпусьцілі пад падпіску аб нявыезьдзе.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG