Адзін з такіх ролікаў выйшаў у тэлеграм-канале «Романов Лайт» 17 траўня — аўтар называе відэа «эксклюзівам». На нём зьнятая 30-гадовая жыхарка Херсона Кацярына Каламеец.
На відэа яна прызнаецца, што дазваляла сабе «грубыя выказваньні» ў адрас расейскіх вайскоўцаў, якіх называла «оркамі». «Сваю віну і неправату я прызнаю. Я прайшла курс дэнацыфікацыі», — кажа жанчына, прыкметна хвалюючыся і запінаючыся.
Потым Каламеец кажа, што заклікае папрасіць прабачэньня і свайго мужа.
Відэа з прабачэньнямі таксама апублікавалі ў канале «Херсонскі веснік». Херсонская вобласьць часткова захопленая расейскім войскам.
Пазьней у канале «Романов Лайт» зьявілася яшчэ адно падобнае відэа. На ім мужчына, які прадстаўляецца грамадзянінам Украіны Раманам Сафаравым, просіць прабачэньня за заклікі да супраціву расейскай арміі і заклікае «ўкраінскую ўладу скласьці зброю».
